Erlent | mbl | 12.3.2018 | 11:06

Kennarar fá skotvopnakennslu

17 manns létust í skotárásinni í Parkland. AFP

Ríkisstjórn Donald Trump mun nota fjármagn sem dómsmálaráðneytið hefur til umráða til að þjálfa kennara og starfsfólk skóla í notkun skotvopna til að reyna að sporna gegn skotárásum í skólum. Þetta kemur fram í tilkynningu sem Hvíta húsið sendi frá sér í gærkvöldi. The Guardian greinir frá.

Þá mun heimavarnarliðið hrinda af stað vitundarvakningarherferð til að koma í veg fyrir slíkar árásir, byggða á herferðinni „Ef þú serð eitthvað, segðu eitthvað,“ sem hrundið var að stað í kjölfar hryðjuverkaárásanna 11. september 2001. Þar var almenningur hvattur til að vera vakandi og tilkynna öll möguleg merki um hryðjuverk.

„Ríkisstjórnin mun í samstarfi við hvert ríki fyrir sig bjóða hæfum sjálfboðaliðum úr skólunum upp á stranga kennslu ú beitingu skotvopna,“ sagði í tilkynningunni frá Hvíta húsinu. Ekki var þó gefið upp hve miklu fjármagni yrði varið í verkefnið.

Frétt af mbl.is

Vilja ekki hertar reglur

Hins vegar hefur verið fallið frá hugmyndum um að draga úr aðgengi að skotvopnum með því að hækka leyfisaldur til að kaupa skotvopn úr 18 ára upp í 21 árs. Félag bandarískra byssueigenda (NRA), var andsnúið því að reglur varðandi skotvopnaeign yrðu hertar, en umræða um takmarkanir á aðgengi að skotvopnum hafa sjaldan verið háværari í Bandaríkjunum og eftir nýlega skotárás í skóla í Flórída.

Nikolas Cruz, nítján ára, varð 17 manns að bana í skotárás á nemendur í bænum Parkland í Flórída um miðjan febrúar. Þá hafa yfir 290 skotárásir verið gerðar í skólum í Bandaríkjunum frá janúar 2013, en að meðaltali hefur verið gerð ein slík skotárás á viku.

Í kjölfar árásarinnar í Flórída var Trump harðlega gagnrýndur fyrir afstöðu sína þegar kemur að hinni lausbeisluðu byssueign Bandaríkjamanna, en NRA var meðal meðal þeirra sem lýstu yfir stuðningi við forsetaframboð hans á sínum tíma.