Tíu létust og 15 slösuðust þegar Kanadamaðurinn Alek Minassian, 25 ára, ók á vegfarendur í miðborg Toronto í gær. „Hreinræktað blóðbað,“ segir yfirlæknir á gjörgæslu sjúkrahússins sem tók á móti tíu fórnarlömbum af vettvangi. Ekki er talið að um hryðjuverk hafi verið að ræða og segir lögreglustjórinn í Toronto borgina örugga. 

Minassian er í haldi lögreglu eftir að hafa ekið sendibifreið, sem hann hafði leigt, á vegfarendur sem voru að fara yfir götuna, síðan ók hann bifreiðinni upp á gangstétt þar sem hann ók fólk vísvitandi niður.

„Einn af öðrum, einn af öðrum,“ hefur New York Times eftir vitni sem rætt var við. „Guð minn góður ég hef aldrei séð neitt eins og þetta áður. Mér varð óglatt,“ bætti hann við.

Að sögn lögreglustjórans í Toronto, Mark Saunders, bendir ekkert til þess að um hryðjuverk hafi verið að ræða þrátt fyrir að ekið hafi verið viljandi á fólkið. Fátt er vitað um Minassian annað en að hann er úr úthverfi Toronto, Richmond Hill, og hefur ekki komist í kast við lögin áður. Saunders segir að augljóst sé að hann ók vísvitandi á fólk en ekki sé vitað hvað honum gekk til. 

Minassian sýndi mótþróa þegar hann var handtekinn og þegar lögreglan varaði hann við því að hann yrði skotinn ef hann legðist ekki niður. „Skjóttu mig í höfuðið,“ svaraði Minassian. Hann var síðan handtekinn án þess að nokkru skoti væri hleypt af.