Hlífði þeim sem hann kunni vel við

Hinn sautján ára gamli Dimitrios Pagourtzis, sem grunaður er um að hafa skotið tíu manns til bana í framhaldsskóla í Texas í gær, hefur viðurkennt að hann valdi fórnarlömb sín og segist ekki hafa skotið ekki á þá sem hann kunni vel við.

Í ítarlegri frétt um málið á vef bandarísku sjónvarpsstöðvarinnar CNN segir að Pagourtzis hafi sýnt lögreglunni samstarfsvilja en hann var handtekinn í kjölfar árásarinnar. Hann var sjálfur nemandi við Santa Fe-skólann þar sem hann framdi voðaverk sitt í gær, vopnaður haglabyssu og skammbyssu. Í árásinni létust níu nemendur og einn kennari og auk þess særðist annar tugur manna. Santa Fe-skólinn er skammt frá Houston.

Frétt af mbl.is

Ein skotárás í skóla í hverri viku

Nemendur við skólann leituðu skjóls í örvæntingu er þeir heyrðu fyrstu skothvellina við upphaf skóladags í gær. 

Byssurnar sem Pagourtzis notaði voru í eigu föður hans. Tveir öryggisverðir í skólanum yfirbuguðu hann skömmu eftir að árásin hófst.

Tíu létust í árásinni og tíu særðust. AFP

CNN segir staðfest að meðal hinna látnu sé skiptinemi frá Pakistan. Þá hafi forfallakennari, Cynthia Tisdale, einnig fallið í árásinni.

Samnemendur Pagourtzis hafa lýst honum sem einrænum. Fáir virðast hafa þekkt hann vel.

Lögreglan hefur m.a. lagt hald á tölvur, dagbækur og farsíma í eigu árásarmannsins. Þá fann hún einnig sprengjubúnað, m.a. rörasprengju fulla af nöglum í og við skólann.

Pagourtzis hefur verið ákærður fyrir morð og þar sem dauðarefsingar eru enn leyfðar í Texas gæti hann átt yfir höfði sér dauðadóm, að því er fram kemur í frétt AFP-fréttastofunnar.

Greg Abbott, ríkisstjóri Texas, segir árásina eina þá viðbjóðslegustu sem gerð hafi verið í sögu Texasríkis. „Ekkert getur undirbúið foreldra fyrir að missa barn sitt,“ sagði Abbott.

• Blogga um frétt