Skógareldarnir við Ljusdal í Svíþjóð hafa breiðst út um þúsundir hektara á síðasta sólarhring. Mikill vindur er á svæðinu og fór eldurinn um tveggja kílómetra leið á miklum hraða. Eldar brenna nú á um 15 þúsund hekturum á þessum slóðum, segir í frétt Aftonbladet.

Í morgun brunnu eldar á 46 stöðum í Svíþjóð. 

Fjórar franskar og ítalskar slökkviflugvélar eru við störf. Þá aðstoða einnig norskir og danskir slökkviliðsmenn sænska slökkviliðið. Í dag er von á 140 pólskum slökkviliðsmönnum á vettvang.

Um sextíu skógareldar loguðu í Svíþjóð í gær og talsmaður almannavarnastofnunar landsins sagði að ekki væri hægt að slökkva þá stærstu eins og staðan væri núna. Liðið gætu nokkrir mánuðir þar til síðustu eldarnir slokknuðu.

„Fjórir eldanna eru nú skilgreindir sem alvarlegir; þeir eru orðnir svo stórir að ógerningur er að slökkva þá sem stendur,“ sagði Marcus Årskog, talsmaður almannavarnastofnunarinnar. „Það sem við getum gert er að hefta útbreiðslu þeirra þannig að þeir nái ekki til þorpa eða byggðra svæða.“

Stærstu eldarnir loga allir í miðhluta Svíþjóðar, þ.e. Fågelsjö og Lillåsen í Jämtland-sýslu, Kårböle í Gävleborg-sýslu, Brattsjö í Västernorrland og Trängslet í Dölunum. Alls hafa 300 til 500 manns þurft að forða sér af heimilum sínum vegna eldanna, samkvæmt síðustu upplýsingum frá almannavarnastofnuninni. Talið er að um tvær milljónir rúmmetra skóglendis hafi brunnið.

Þurfa að slátra kúm

Þyrlur og flugvélar frá Noregi og nokkrum Evrópusambandslöndum hafa tekið þátt í slökkvistarfinu þar sem eldarnir eru mestir, að sögn fréttavefjar sænska ríkisútvarpsins í gær.

Langvarandi þurrkar og hlýindi hafa verið á stórum hluta Svíþjóðar, auk Danmerkur, Suður-Noregs og Norður-Finnlands. Að sögn veðurfræðinga er ólíklegt að breyting verði á því á næstunni.

Gríðarlega þurrt er á stórum landsvæðum í Svíþjóð. AFP

Að frátalinni lítils háttar úrkomu um miðjan júní hefur nánast ekkert rignt í Svíþjóð frá byrjun maí. „Hlýindin voru óvenjumikil í maí í suður- og miðhluta Svíþjóðar og júní var sá hlýjasti í rúm 100 ár syðst á landinu,“ segir Sverker Hellström, veðurfræðingur sænsku veðurstofunnar.

Þurrkarnir hafa valdið skorti á fóðri fyrir búpening og sænskir bændur hafa þurft að grípa til þess ráðs að slátra kúm. „Þetta er mesta erfiðleikatímabil fyrir sænska bændur í rúm 50 ár,“ segir Ulf Wallin, talsmaður samtaka þeirra. 

Hnotskurn

• Um 700 slökkviliðs- og björgunarmenn og 500 hermenn taka þátt í slökkvistarfinu þar sem skógareldarnir eru stærstir.
• Hundruð sjálfboðaliða hafa verið skráð og Rauða krossinum í Svíþjóð hefur verið falið að samhæfa aðstoð þeirra við slökkvistarfið.

Tengdar fréttir

Skógareldar í Svíþjóð

„Vetrarlandið okkar er að brenna“

• Svíar fá aðstoð frá NATÓ
• Spá rigningu í Svíþjóð
• Eldarnir slokkna ekki fyrr en snjóar
• Spá methita í Svíþjóð

» Fleiri tengdar fréttir

• Blogga um frétt