Skógareldar í Grikklandi undanfarna daga hafa kostað að minnsta kosti tuttugu mannslíf samkvæmt upplýsingum frá ríkisstjórn landsins. Grikkir hafa óskað eftir aðstoð alþjóðasamfélagsins í baráttunni við eldana.
Hundruð slökkviliðsmanna eru að störfum við slökkva eldana en fólk hefur þurft að yfirgefa heimili sín í nágrenni höfuðborgarinnar, Aþenu.
Í frétt BBC kemur fram að leit standi yfir að tíu ferðamönnum sem flúðu undan eldinum á bát.
„Við gerum allt sem í mannlegu valdi stendur til þess að ná tökum á þessu,“ sagði Alexis Tsipras, forsætisráðherra á fundi með fréttamönnum en hann batt enda á opinbera heimsókn sína í Bosníu vegna skógareldanna.
Að sögn slökkviliðsmanna er gríðarlega erfitt að ná yfirtökum á eldinum en flestir þeirra 20 sem vitað er að eru látnir lokuðust inni í strandbænum Mati, sem er 40 km norðaustur af Aþenu. Hefur fólkið fundist látið á heimilum sínum og bílum. Vitað er um að 104 hafi slasast, þar af 11 alvarlega að sögn talsmanns ríkisstjórnarinnar, Dimitris Tzanakopoulos. Af þeim slösuðu eru 16 börn.