Alls hafa fimmtíu fundist látnir eftir skógareldana í Grikklandi. Yfirvöld höfðu áður talið að 24 hefðu látist en í morgun fundust 26 lík í strandbænum Mati sem er í 40 km fjarlægð frá höfuðborginni, Aþenu. Það voru félagar í Rauða krossinum sem fundu þá látnu í garði við glæsihýsi skammt fyrir utan þorpið.
Yfir 150 hafa slasast í skógareldunum.
„Við gerum allt sem í mannlegu valdi stendur til þess að ná tökum á þessu,“ sagði Alexis Tsipras forsætisráðherra á fundi með fréttamönnum en hann batt enda á opinbera heimsókn sína í Bosníu vegna skógareldanna.
Að sögn slökkviliðsmanna er gríðarlega erfitt að ná yfirtökum á eldinum en flestir þeirra sem vitað er að eru látnir lokuðust inni í strandbænum Mati, sem er 40 km norðaustur af Aþenu.