Hundruða er saknað og fjölmargir eru taldir látnir eftir að stífla við vatnsaflstöð í suðausturhluta Laos brast í gær. Ríkisfjölmiðlar í Laos greindu frá þessu í dag en óhappið varð í gærkvöldi.
Við það leystust úr læðingi fimm milljarðar rúmmetra vatns og er vitað að einhverjir drukknuðu og margra er saknað en vatnsflaumurinn fór yfir sex þorp í nágrenninu. Yfir sex þúsund manns misstu heimili sín í flóðunum.
Ekki hefur verið upplýst um hvað varð til þess að stíflan brast en orkufyrirtækið Xe Pien-Xe Namnoy (PNPC) reisti stífluna í Attapeua-héraði.
Forsætisráðherra Laos, Thongloun Sisoulith, hefur frestað ríkisstjórnarfundi og er farinn á hamfarasvæðið ásamt embættismönnum og fulltrúum almannavarna. Sveitarstjórnin hefur óskað eftir aðstoð ríkisins við að koma neyðaraðstoð til fórnarlambanna, svo sem fatnaði, mat, drykkjarhæfu vatni og lyfjum.