Mikill meirihluti, eða 78%, Breta segir ríkisstjórn Bretlands undir forystu Theresu May forsætisráðherra standa illa að viðræðum um útgöngu Breta úr Evrópusambandinu (Brexit), samkvæmt nýrri könnun Sky-fréttastofunnar. Þetta er um 23 prósentustiga aukning óánægðra frá könnun fréttastofunnar í mars þegar 55% sögðu ríkisstjórnina standa illa að málinu. Aðeins 10% segja ríkisstjórnina standa vel að málinu, en 23% sögðu það sama í mars.

Þá segjast 74% óánægð með störf forsætisráðherrans á meðan 24% segjast ánægð með störf May. Í mars sögðust 59% óánægð, en 41% ánægð.

Helmingur svarenda vilja að haldin verði þjóðaratkvæðagreiðsla um þann samning sem stendur til að gera við Evrópusambandið vegna Brexit, á meðan 40% vilja það ekki.

Theresa May, forsætisráðherra Bretlands, nýtur ekki mikils stuðnings samkvæmt könnun Sky. AFP

Vilja frekar engan samning fram yfir tillögu May

Áberandi er að talsverð óánægja er með fyrirhugað Brexit-samkomulag ríkisstjórnarinnar og segjast aðeins 13% styðja áform ríkisstjórnarinnar. 27% vilja ganga úr Evrópusambandinu án þess að sérstakur samningur verði gerður við Evrópusambandið.

Meðal þeirra sem segjast hafa greitt atkvæði með Brexit í þjóðaratkvæðagreiðslunni sem haldin var um málið í júní 2016, segjast 51% frekar vilja engan samning við Evrópusambandið fram yfir samkomulag ríkisstjórnarinnar. 22% segjast styðja samkomulagið.

Kjósendur Íhaldsflokksins, flokks May, eru á sama máli en aðeins 21% styðja yfirlýstum áformum ríkisstjórnarinnar á meðan 44% þeirra segjast frekar vilja engan samning.

Hægt að bjarga málinu

Boris Johnsons, þingmaður íhaldsflokksins og fyrrverandi utanríkisráðherra Bretlands, lýsti því yfir á breska þinginu nýverið að enn væri hægt að bjarga Brexit. Sagði hann Theresu May hafa stýrt málinu illa og skapað óþarfa óvissu.

Johnson sagði sig frá embætti utanríkisráðherra í kjölfar þess að kynnt var hvernig ríkisstjórnin sér fyrir sér framtíðarfyrirkomulag samskipta Bretlands og Evrópusambandsins við útgöngu Breta úr Evrópusambandinu. Meðal umkvörtunarefna Johnson eru áform um að halda Bretlandi í sameiginlegu tollsvæði Evrópusambandsins.

Frétt af mbl.is

Ekki of seint að „bjarga Brexit“

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• Blogga um frétt