Eiffel-turninn, helsta kennileiti Parísar og Frakklands, hefur verið lokaður fyrir almenningi frá því í gær vegna verkfalls starfsmanna við turninn. Stjórnendur rekstrar Eiffel-turnsins og verkalýðsfélög komust að samkomulagi í kvöld um að opna turninn á ný á morgun.
Blásið var til verkfalls vegna óánægju meðal starfsmanna við turninn um nýja aðgangsstefnu við turninn. Starfsmenn segja að nýja fyrirkomulagið auki biðraðir. Lausn í deilunni náðist í dag og því má búast við löngum röðum við turninn á morgun þegar hann opnar á ný, en hvort það tengist nýja fyrirkomulaginu eða þeirri staðreynd að turninn hefur verið lokaður í rúman sólarhring skal ósagt látið.