Erlent | AFP | 6.8.2018 | 23:01 | Uppfært 7.8.2018 3:03

Birta myndir af undirbúningi Barcelona-árásarinnar

Youssef Aalla, einn liðsmanna sellunar sem stóð að hryðjuverkárásinni á Barcelona, brosir hér með sprengjubelti um sig miðjan. AFP

Spænskir fjölmiðar birtu í dag myndir sem sýna mennina, sem stóðu að hryðjuverkaárásinni á Barcelona og strandbæinn Cambrils í ágúst í fyrra, undirbúa árásir sínar.

Á myndunum sem birtar voru í dag má m.a. sjá einn liðsmanna sellunnar brosa og benda til himins þar sem hann ber sprengjubelti um sig miðjan. Á annarri mynd stilla tveir menn sem eru að útbúa sprengjur sér upp fyrir myndavélina. Ein myndanna sýnir þá einn árásarmannanna standa við hlið Eiffelturnsins í París.

AFP-fréttastofan segir einn mannanna sem sjást útbúa sprengjuna vera Younes Abouyaaqoub, en hann ók sendibíl inn í mannfjöldann á Römblunni 17. ágúst í fyrra með þeim afleiðingum að 13 manns létu lífið. Hann stakk síðan einn til viðbótar til bana er hann flúði á brott. Abouyaaqoub féll fyrir skotum lögreglu nokkrum dögum síðar.

Abouyaaqouab Aalla og Hichamy sjást hér útbúa sprengju. AFP

Spænska dagblaðið La Razon, er einn þeirra fjölmiðla sem birt hafa myndirnar. Segir blaðið myndirnar hafa fundist ásamt myndbandsupptökum í rústum hússins í Alcanar þar sem hópurinn bjó til sprengjur sínar.

Sprenging varð í húsinu nóttina fyrir árásina og létust tveir liðsmenn sellunnar í sprengingunni sem gerði hópnum ómögulegt að gera sprengjuárás líkt og til hafði staðið. Þeir breyttu því áætlun sinni og notuðu bíla til verksins.

Alls létust 16 í árásunum, sem vígasamtökin Ríki íslams lýstu yfir ábyrgð á.

La Razon birti einnig afrit af samræðum mannanna þar sem þeir stæra sig af væntanlegum árásum og gera grín að fórnarlömbum sínum.

„Allah hefur valið okkur úr milljónum manna til að láta ykkur gráta blóði,“ er haft eftir Omar Hichamy, einum liðsmanna sellunnar.

Mennirnir sex sem framkvæmdu árásirnar voru allir af marokkóskum uppruna. Þeir voru á aldrinum 17-24 ára og féllu allir í aðgerðum lögreglu. Talið er að marokkóski imaminn Abdelbaki Es Satty, sem talinn er hafa verið höfuðpaur sellunnar, hafi farist í sprengingunni í Alcanar.