Erlent | AFP | 7.11.2018 | 7:23

Pelosi tekur við af Ryan

Talið er fullvíst að leiðtogi demókrata, Nancy Pelosi, muni taka sæti forseta fulltrúadeildarinnar nú eftir að demókratar hafa endurheimt meirihlutann í deildinni. Paul Ryan, sem hefur gegnt embættinu undanfarin ár fyrir repúblikana, er hættur á þingi.

Ryan var ekki valmöguleiki á kjörseðilinum í 1. kjördæmi Wisconsin-ríkis, í fyrsta sinn síðan 1998. Ryan, forseti þingdeildarinnar og fyrrverandi varaforsetaefni Mitt Romney 2012, ákvað óvænt að sækjast ekki eftir endurkjöri.

Verði Pelosi forseti þingdeildarinnar verður hún valdamesta konan í bandarískum stjórnmálum en staða kvenna batnar mjög á Bandaríkjaþingi eftir þessar kosningar. Pelosi var forseti fulltrúardeildarinnar frá 2007 til 2011 og þar með fyrsta konan til að gegna þessu valdamikla embætti. Þegar ljóst var að demókratar myndu ná meirihlutanum hringdi forseti Bandaríkjanna, Donald Trump, í hana og óskaði henni til hamingju. Trump getur glaðst yfir ýmsu í þessum kosningum því þeir frambjóðendur sem hann studdi með ráðum og dáð gekk mjög vel.

Þegar Pelosi gegndi embætti forseta fulltrúadeildarinnar (2007-2008) stóð hún mjög uppi í hárinu á þáverandi forseta Bandaríkjanna, George W. Bush, en Barack Obama var síðan kjörinn forseti. Fastlega má gera ráð fyrir að staðan verði svipuð nú þegar repúblikani situr á forsetastóli.

Demókratar geta nú komið í veg fyrir lagasetningar repúblikana, svo sem lækkun skatta til þess að reisa múr á landamærum Mexíkó.

Allt bendir nú til þess að Trump geti lent í vanda með fjármögnun múrsins þar sem repúblikaninn Kevin Yoder náði ekki kjöri. Hann komst á þing árið 2010 og sóttist eftir endurkjöri í ár. Obama tapaði kjördæminu árið 2012 fyrir Mitt Romney með miklum mun en Hillary Clinton hafði betur gegn Trump með naumindum árið 2016.

Yoder er yfirmaður fjárveitinganefndar fyrir öryggismál í fulltrúadeildinni. Hann hefur þannig fjárveitingavald til að hafna eða setja fé í múrinn en það breyttist í nótt því demókratinn Sharice Davids hafði betur.

Í fréttaskýringu Magnúsar Heimis Jónassonar á mbl.is nýverið kom fram að Davids er 38 ára lögmaður og fyrrverandi MMA-bardagakona. Hún er samkynhneigður frumbyggi og vann sterkan sigur á móti öflugum frambjóðendum í prófkjöri demókrata.

Auk hennar var Deb Haaland kjörin á þing fyrir demókrata en þær tvær eru fyrstu frumbyggjakonurnar sem kjörnar eru á þing í Bandaríkjunum.