Fjöldi látinna vegna skógareldanna sem geisað hafa í Kaliforníu-ríki í Bandaríkjunum er kominn í níu. Öll dauðsföllin urðu í bænum Paradise norður af höfuðborg ríkisins, Sacramento, en öllum íbúum bæjarins hefur verið fyrirskipað að yfirgefa hann.

Skógareldarnir hófust á fimmtudaginn og eru annars vegar í vesturhluta Kaliforníu-ríkis og hins vegar í suðurhluta ríkisins. Haft er eftir embættismönnum í frétt AFP að umfang þess eignatjóns sem orðið hafi í eldunum sé gríðarlegt fyrir utan manntjónið.