7.000 ungmenni með sykursýki 2

Allt að 7.000 börn og ungmenni undir 25 ára eru með sykursýki af gerð 2 í Englandi og Wales, og er fjöldinn tíu sinnum meiri en áður hafði verið haldið fram. Í ljós hefur komið að flestir leita meðferðar hjá heimilislæknum fremur en sérfræðingum.

Frétt af mbl.is

Algengara að vera yfir kjörþyngd

BBC greinir frá því að helsta ástæða faraldursins sé offita og sérfræðingar í heilsu barna í Bretlandi hafa nú kallað eftir aðgerðum stjórnvalda til að koma böndum á ástandið.

Eitt af hverjum þremur börnum í Englandi og Wales eru í yfirþyngd eða of feit þegar þau útskrifast úr grunnskóla og segja bresku offitusamtökin fjölda sykursjúkra ekki koma á óvart, en að ástandið sé sorglegt og óásættanlegt.

Stærstur hluti þeirra sem greinst hafa með sykursýki 2 í löndunum tveimur eru á aldrinum 20 til 24 ára, en þó leiddi rannsóknin, sem framkvæmd var á árunum 2016 til 2017, í ljós að ellefu börn á aldrinum fimm til níu ára væru greind með sykursýki 2, og 196 tíu til fjórtán ára gömul börn.

Insúlínskortur yfirvofandi á næstu árum

Í gær greindi fréttastofa Reuters frá rannsókn sem sýnir að spurn eftir insúlíni vegna sykursýki sé í hámarki og að framboð þurfi að aukast um yfir 20% á næstu tólf árum til þess að mæta eftirspurn. Ef framboð eykst ekki og verði verður ekki haldið í lágmarki má gera ráð fyrir því að tugir milljóna manna muni upplifa insúlínskort.

Níu prósent fullorðinna í heiminum eru með sykursýki 2, sem getur leitt til blindu, nýrnabilunar, hjartavandamála og aflimana.

• Blogga um frétt