Haspel kemur fyrir Bandaríkjaþing vegna morðsins á Khashoggi
Setja bókamerki
Gina Haspel, forstjóri bandarísku leyniþjónustunnar (CIA), kemur fyrir Bandaríkjaþing í dag þar sem hún mun fara yfir atburðarrásina sem leiddi til morðsins á sádi-arabíska blaðamanninum Jamal Khashoggi. Haspel mun einnig hitta leiðtoga öldungadeildarþingsins.
Haspel var ekki viðstödd í síðustu viku þegar Mike Pompeo utanríkisráðherra og James Mattis varnarmálaráðherra ræddu morðið við þingheim og voru nokkrir þingmenn ósáttir við fjarveru hennar.
Khashoggi var myrtur á ræðismannsskrifstofu Sádi-Arabíu í Istanbúl í október. Bandarískir fjölmiðlar greindu frá því um miðjan nóvember að CIA hafi komist að þeirri niðurstöðu að Mohammend bin Salman, krónprins Sádi-Arabíu, hafi fyrirskipað morðið á Khashoggi.
Haspel er sögð mjög ósátt við að niðurstöðu rannsóknar CIA hafi verið lekið í fjölmiðla. Leyniþjónustan hefur ekki staðfest að Haspel muni koma fyrir þingið í dag.
Trump segir niðurstöðu CIA ekki endanlega
Yfirvöld í Sádi-Arabíu hafa ákært ellefu manns fyrir morðið en þvertaka fyrir að krónprinsinn hafi nokkuð með morðið að gera. CIA hefur hins vegar sannanir fyrir því að nokkrum klukkustundum áður en Khashoggi var myrtur sendi krónprins Sádi-Arabíu að minnsta kosti 11 skilaboð til Saud al-Qahtani, nánasta ráðgjafa síns, sem hefur verið ákærður fyrir að hafa skipulagt morðið.
Pompeo og Mattis sögðu hins vegar við öldungadeildarþingmenn í síðustu viku að engar beinar sannanir væru fyrir aðkomu krónprinsins að morðinu. Þá hefur Donald Trump Bandaríkjaforseti sagt að niðurstaða CIA sé ekki endanleg.
Fyrir um það bil tveimur vikum gaf Trump út yfirlýsingu þar sem hann sagði að krónprinsinn hafi jafnvel vitað af þessum hörmulega atburði. Kannski vissi hann, kannski ekki, sagði í yfirlýsingunni.
Fundur hafinn hjá kennurum, ríki og sveitarfélögum
Vonir bundnar við morgundaginn
Koma fyrstu tölur á sunnudagskvöldið?
Fæðuöryggi: „Áttum mat í þrjár vikur“
Ákærður fyrir stunguárás á menningarnótt
Hvatti kjósendur til þess að greiða ógild atkvæði
Dæla, kæla og verja mikilvæg mannvirki