Norskri konu á sjötugsaldri, Anne-Elisabeth Falkevik, var rænt fyrir tíu vikum og krefjast mannræningjarnir þess að eiginmaður hennar, Tom Hagen, greiði 85,9 milljónir norskra króna, sem svarar til 1,2 milljarða íslenskra króna, í lausnargjald. Fyrst var fjallað um mannránið í norskum fjölmiðlum í dag. 

Tom Hagen skipar 172. sætið á lista yfir ríkasta fólkið í Noregi, samkvæmt lista Kapital-tímaritsins en eignir hans eru metnar á 1,7 milljarða norskra króna, sem svarar til 23,7 milljarða króna. Hagen er umsvifamikill í fasteignaviðskiptum og á auk þess 70% hlut í orkufyrirtækinu Elkraft. 

VG greinir frá því að Anne-Elisabeth Falkevik hafi horfið 31. október og að mannræningjarnir hafi farið fram á að fá lausnarféð greitt í rafmynt. Þeir hafa hótað því að beita Falkevik ofbeldi verði kröfum þeirra ekki mætt. 

Norska lögreglan hefur staðfest að konu á sjötugsaldri hafi verið rænt á heimili hennar í Lørenskog, skammt frá Ósló, en hefur ekki upplýst um hver konan er. Boðað hefur verið til blaðamannafundar og er hann að hefjast. 

Hægt er að fylgjast með honum á vef Aftenposten

Samkvæmt frétt VG hafa norskir fjölmiðlar vitað af mannráninu í einhvern tíma en farið að óskum lögreglu um að fjalla ekki um það opinberlega.

Auk Kripos, norsku ríkisrannsóknarlögreglunnar og efnahagsbrotadeildarinnar koma  Europol og Interpol að rannsókninni auk ríkissaksóknara.

Frétt VG

Frétt NRK

Tengdar fréttir

Hvarf Anne-Elisabeth Hagen

Netflix með þætti um Hagen-hvarfið

• „Vil vita hver urðu örlög hennar“
• Tugir reyna að leysa ráðgátuna 3 árum síðar
• Lögmaður Tom Hagen skellti á blaðamann mbl.is
• „Ég gerði þetta ekki“

» Fleiri tengdar fréttir

• Blogga um frétt