200 saknað eftir að stífla brast

200 manns er saknað eftir að stífla brast í námu í Minas Gerais-fylki í Brasilíu með þeim afleiðingum að þykk leðja flæddi yfir sveitirnar í nágrenninu.

Hjálparsveitir hafa verið sendar á vettvang og segir slökkviliðið á staðnum að allt að 200 manns sé nú saknað. BBC segir engar fréttir hafa enn borist af því að flóðið hafi reynst mannskætt, en óttast sé að margir hafi farist. Reuters hefur eftir yfirvöldum í héraðinu að átta manns hafi verið fluttir á spítala.

Búið er að flytja á brott fjölda manns sem býr í næsta nágrenni við stífluna, sem var notuð til að geyma botnfall úr Feijão-járngrýtisnámunni sem er í eigu Vale, sem er stærsta námafyrirtæki Brasilíu.

Brasilískir fjölmiðlar hafa í dag birt myndir af leðjuflóðinu þar sem það flæðir yfir vegi og eyðileggur byggingar.

Talsmaður brasilísku stjórnarinnar segir Ricardo Salles, umhverfisráðherra Brasilíu, vera væntanlegan á vettvang.

Fjögur ár eru nú liðin frá því önnur stífla brast í Minas Gerais með þeim afleiðingum að 19 manns létust. Sú stífla var einnig í eigu Vale og fyrirtækisins BHP Billiton og er það talið versta umhverfisslys sem orðið hefur í landinu.

Frétt af mbl.is

25 manns enn saknað

• Blogga um frétt