Ríkisstjórn Spánar lýsti því yfir í dag að hún veiti Nicolas Maduro, forseta Venesúela, átta daga frest til þess að boða til kosninga í landinu. Ellegar muni þau viðurkenna Juan Guaidó, leiðtoga stjórnarandstöðunnar í Venesúela, sem forseta landsins.

„Verði ekki boðað til frjálsra, sanngjarnra og gagnsærra kosninga í Venesúela innan átta daga mun Spánn viðurkenna Juan Guaidó sem forseta Venesúela, sagði Pedro Sanchez forsætisráðherra Spánar í sjónvarpsávarpi.

AFP-fréttaveitan segir yfirlýsingu Sanchez vera þá berorðustu sem ESB-ríki hafi til þessa sent frá sér varðandi stjórnarkreppuna í Venesúela, en Venesúela er fyrrverandi spænsk nýlenda.

Guaido, lýsti sig starfandi forseta landsins á mótmælafundi í vikunni. Er hann að reyna að fá Maduro til að segja af sér embætti, en forsetakosningar sem haldnar voru í landinu síðasta sumar þykja mjög umdeildar.

Guaidó hafnaði í gær boði Maduros um viðræður og hvatti þess í stað til þess að „meiri háttar mótmælaganga“ yrði farin.

Bandaríkin, Kanada, Brasilía og Argentína eru meðal þeirra ríkja sem þegar hafa lýst yfir stuðningi við Guaidó.

Tengdar fréttir

Venesúela

Íbúar Venesúela flýja til Kólumbíu

• Skrá sig á Only Fans til að létta róðurinn
• Deilan um gullforða Venesúela heldur áfram
• Rétta yfir bandarískum „málaliðum“
• „Valdaránið“ tengist ekki Bandaríkjastjórn

» Fleiri tengdar fréttir

• Blogga um frétt