Yfirvöld í Taílandi eru hætt við að krefjast þess að knattspyrnumaðurinn Hakeem al-Araibi verði framseldur til landsins.
„Okkur hefur verið greint frá því að Barein vilji draga til baka kröfuna [um framsal] […] ef þau vilja ekki fá hann þá er engin ástæða fyrir okkur að halda honum hér,“ sagði Chatchom Akapin hjá stofnun alþjóðamála í Taílandi. Hann bætti við að unnið sé að því að sleppa honum úr haldi.
Hakeem al-Aribi, sem er flóttamaður frá Barein, er búsettur í Ástralíu. Hann var stöðvaður að beiðni yfirvalda í Barein á alþjóðaflugvellinum í Bangkok í nóvember og hefur verið í haldi taílenskra yfirvalda síðan þá.
Hann hlaut tíu ára fangelsisdóm fyrir að hafa unnið skemmdir á lögreglustöð í Barein en hann var ekki viðstaddur réttarhöldin. Að eigin sögn var hann ekki einu sinni staddur í landinu þegar hann á að hafa unnið skemmdarverkið þar sem hann var með landsliðinu í útlöndum.
Al-Araibi segir ástæðuna fyrir því að hann er skotmark yfirvalda vera þá að hann hefur gagnrýnt Knattspyrnusamband Asíu (AFC) en forseti þess er sjeik Salman bin Ebrahim Al Khalifa, sem tilheyrir konungsfjölskyldunni í Barein. Þegar knattspyrnumaðurinn var handtekinn á flugvellinum í Taílandi var hann í brúðkaupsferðalagi.
Didier Drogba, Jamie Vardy og Craig Foster frá Ástraíu eru á meðal þekktra núverandi og fyrrverandi knattspyrnumanna sem hafa krafist lausnar hans. Áströlsk stjórnvöld og Alþjóðaknattspyrnusambandið hafa einnig talað máli hans.