Donald Trump Bandaríkjaforseti sagði í morgun að hann teldi ekki að Kim Jong-un, leiðtogi Norður-Kóreu, bæri ábyrgð á dauða bandaríska námsmannsins Otto Warmbier sem lést árið 2017 í Bandaríkjunum eftir að hafa verið í haldi stjórnvalda í Norður-Kóreu.
Kim neitaði því að hafa vitað um þá illu meðferð sem Warmbier hlaut í Norður-Kóreu.
„Honum leið illa út af þessu, honum leið mjög illa,“ sagði Trump á blaðamannafundi eftir leiðtogafund forsetans og leiðtoga Norður-Kóreu í Víetnam.
Stjórnvöld í Norður-Kóreu handsömuðu Otto Warmbier árið 2016 þegar hann var á leið úr landinu eftir fimm daga ferðalag. Warmbier, sem var á þeim tíma stúdent við Virginíuháskóla, var sakaður um að hafa stolið veggspjaldi af hótelinu sem hann dvaldi á.
Warmbier var skilað aftur til Bandaríkjanna í júní 2017 eftir samningaviðræður sem ríkisstjórn Donald Trump Bandaríkjaforseta leiddi. Við komuna til Bandaríkjanna var Warmbier bæði blindur og heyrnarlaus auk þess sem hann hafði orðið fyrir verulegum heilaskaða eftir dvöl sína í varðhaldi. Hann lést eftir að hafa dvalið innan við viku í Bandaríkjunum.
Trump sagði að Kim bæri ekki ábyrgð á örlögum Warmbier þótt hann viðurkenndi að aðstæður í fangelsum í Norður-Kóreu væru nöturlegar. Forsetinn sagðist trúa Kim vegna þess að það hefði ekki komið sér vel fyrir Kim að Warmbier hefði orðið fyrir heilaskaða í fangelsinu.
„Ég held að hann hafi ekkert vitað um þetta. Ég trúi því ekki að Kim hefði leyft þessu að gerast,“ sagði Trump.