Erlent | AFP | 14.3.2019 | 6:17

Ákveðin líkindi með flugslysunum

Boeing 737 Max 8-þotur hafa verið kyrrsettar af bandarískum flugmálayfirvöldum. AFP

Boeing hefur kyrrsett allan 737 Max-flugflotann eftir að rannsókn leiddi í ljós nýjar upplýsingar á vettvangi slyssins þar sem þota Ethiopian Airlines fórst á sunnudagsmorgun. Alls er 371 þota af 737 Max-gerð í notkun í heiminum.

Flugmálastjórn (Federal Aviation Administration) segir að auk þess hafi nýjar upplýsingar úr gervihnöttum ýtt undir þá ákvörðun að leggja bann við notkun farþegaþotanna.

Ákvörðun bandarískra flugmálayfirvalda um að kyrrsetja allan 737 Max-flugflotann er tekin í ljósi ákveðinna líkinda með flugslysinu í Addis Ababa á sunnudag og slysinu í Indónesíu fyrir fimm mánuðum en þá létust 189, eða allir um borð.

Er þetta í samræmi við frétt af tilkynningum bandarískra flugmanna sem kvörtuðu yfir vandamálum varðandi vélina á síðasta ári. Að minnsta kosti fjórir bandarískir flugmenn lögðu fram kvörtun í kjölfar þess er Lion Air-þotan brotlenti í Indónesíu í október. Slysið varð skömmu eftir flugtak. Flugmennirnir kvörtuðu allir yfir því að flugvélin hafi skyndilega stefnt niður.

Lion Air-flugslysið hefur verið rakið til þess að sjálfvirkni í stjórnklefanum, sem átti að auka á öryggi flugvélar og farþega, hafi snúist upp í andhverfu sína. Allt virðist sem öryggisbúnaðurinn hafi ruglað flugmennina í ríminu og þannig átt sinn þátt í slysinu.

Samkvæmt FAA virðast ýmis líkindi vera með flugslysunum og því hafi verið tekin ákvörðun um að kyrrsetja allar 737 MAX 8- og MAX 9-þoturnar.