Danir völdu Ericsson frekar en Huawei

Stærsta fjarskiptafyrirtæki Danmerkur, TDC, hefur ákveðið að sænska fyrirtækið Ericsson muni koma að uppbyggingu 5G-kerfisins þar í landi, en ekki kínverska fyrirtækið Huawei, sem einnig falaðist eftir verkinu í útboði. Greint er frá þessu á vef DR.

Ákvörðunin var tilkynnt í gær og kemur í kjölfar töluverðrar opinberrar umræðu í Danmörku um það, hvort það geti falið í sér öryggisógn að láta kínverska fyrirtækið taka þátt í 5G-væðingunni þar í landi.

Lestu meira

5G farsímanet handan við hornið

Undanfarnar vikur og mánuði hafa Bandaríkjamenn varað við því að vestrænir bandamenn þeirra semji við fyrirtækið eða þriðju aðila sem nota búnað frá Huawei um 5G-væðingu ríkja sinna, þar sem öryggi upplýsinga sem fara um búnað Huawei sé ótryggt.

Allison Kirkby, framkvæmdastjóri TDC, segir í samtali við DR að sú ákvörðun að slíta viðskiptasambandinu við Huawei sé eingöngu tekin á viðskiptalegum forsendum, en Huawei og TDC hafa verið í samstarfi óslitið síðustu tólf ár og hefur Huawei byggt upp 4G-kerfi TDC í Danmörku. 

• Blogga um frétt