Fertugur karlmaður í Indiana í Bandaríkjunum hefur kært foreldra sína fyrir að henda klámmyndasafni sem hann átti og geymdi á heimili þeirra. Hann telur safnið dýrmætt eða um 3,5 milljóna króna virði.
Forsaga málsins er sú að maðurinn flutti aftur heim í foreldrahús árið 2016 í kjölfar skilnaðar. Þar bjó hann í tíu mánuði og er foreldrarnir sendu honum eigur hans á nýja heimilið vantaði allt klámsafnið í farminn. Klámsafnið samanstóð af tólf kössum af klámmyndum og klámblöðum.
Maðurinn leitaði til lögreglu sem þótti ekki tilefni til að rannsaka málið. Hann ákvað því að höfða einkamál á hendur foreldrum sínum. Meðal gagna málsins eru tölvupóstar sem fóru á milli hans og föður hans. Í einum þeirra skrifaði faðirinn: „Ég gerði þér stóran greiða með því að henda öllu þessu dóti.“
Maðurinn fer fram á um tíu milljónir króna í skaðabætur.
AP-fréttastofan greinir frá.