Arkitektar sem vinna að því að varðveita það sem eftir stendur af Notre Dame-dómkirkjunni vinna í kapphlaupi við tímann að því að hylja hana svo að rigning valdi ekki frekari skemmdum.

Spáð er skúrum og mögulega þrumuveðri með tilheyrandi rigningu á morgun í frönsku höfuðborginni, París.

Hvelfing kirkjunnar, sem hrundi að hluta í eldsvoðanum, er nú þegar vatnssósa í kjölfar slökkvistarfsins. Arkitektarnir óttast að mikil rigning geti valdið enn meiri skaða og jafnvel hruni, að því er segir í frétt BBC um málið.

Sá sem fer fyrir varðveislunni, arkitektinn Philippe Villeneuve, segir það forgangsatriði að draga segldúk yfir hvelfinguna. Hann segir allt til reiðu og ekki eftir neinu að bíða nema dúknum sem sé á leiðinni.

Emmanuel Macron Frakklandsforseti hefur heitið því að dómkirkjan verði endurbyggð en hún er eitt helsta kennileiti borgarinnar, byggð fyrir um 850 árum. Macron segir stefnt að því að endurbyggingunni verði lokið fyrir ólympíuleikana sem fram munu fara í París árið 2024.

Tengdar fréttir

Eldur í Notre-Dame í París

Ætlar að „endurlífga“ orgel Notre Dame

• „Hún er jafnvel fegurri en áður“
• Hvað er heilbrigt samband og hvað er eitrað samband?
• Tvö ár frá eldsvoðanum í Notre-Dame
• Viðgerðir á Notre Dame taki 15-20 ár

» Fleiri tengdar fréttir

• Blogga um frétt