Sú ákvörðun yfirkjörstjórnar Tyrklands að fyrirskipa að kosið verði á ný í Istanbúl eftir að stjórnarandstöðuflokkur fór með sigur af hólmi í kosningum í borginni í mars hefur sætt harðri gagnrýni að því er BBC greinir frá.

AK, flokkur forsetans, Recep Tayyip Erdogan, hafði fullyrt að sigur stjórnarandstöðuflokksins CHP mætti rekja til spillingar og óreglu í kosningunum og fór fram á endurtalningu er úrslitin lágu fyrir.

Ekrem Imamoglu, oddviti CHP-flokksins, sem var kjörinn borgarstjóri Istanbúl í síðasta mánuði, segir ákvörðun yfirkjörstjórnarinnar „sviksamlega“.

Þegar hefur komið til mótmæla í Istanbúl vegna kosninganna sem halda á 23. júní. Þannig komu hundruð saman í nokkrum hverfum borgarinnar í gær, þar sem þeir börðu í potta og pönnur og hrópuðu slagorð gegn stjórnvöldum.

Evrópuþingið hefur einnig lýst því yfir að sú ákvörðun að endurtaka kosningarnar muni skaða trúverðugleika lýðræðislegra kosninga í Tyrklandi.

Fulltrúi AKP-flokksins í kjörstjórn, Recep Ozel, segir ástæðu þess að kjósa þurfi á ný vera þá að ekki voru allir starfsmenn kosninganna opinberir starfsmenn og þá hafi skrár yfir niðurstöðu kosninganna ekki haft rétta undirskrift í öllum tilfellum.

Onursal Adiguzel, varaformaður CHP, segir ákvörðunina hins vegar sýna að „það sé ólöglegt að sigra AKP“. Ákvörðunin væri dæmi um „hreinræktað einræði“.

Tengdar fréttir

Tyrkland

Svara hryðjuverki með loftárás

• Múslimaklerkurinn Gulen er látinn
• Tyrkir vilji hleypa nýju pólitísku andrúmslofti inn
• Átök í Tyrklandi á kjördag
• Erdogan ýjar að starfslokum sínum

» Fleiri tengdar fréttir

• Blogga um frétt