Erlent | mbl | 28.6.2019 | 8:19

Ræðir Skripal-málið við Pútín

AFP

Theresa May, forsætisráðherra Bretlands, ætlar að nota tækifærið á fundi leiðtoga G-20-ríkjanna sem hefst í dag til þess að ræða augliti til auglitis við Vladimír Pútín, forseta Rússlands, um Skripal-málið. Þar ætlar hún að ítreka kröfu Breta um að þeir sem beri ábyrgð á því að hafa eitrað fyrir Skripal-feðginunum í Salisbury verði dregnir fyrir dóm.

Frétt af mbl.is

Skripal smáseiði með valdamikinn óvin

May greindi frá þessu þegar tilkynnt var um fund þeirra Pútín í Osaka í Japan og virðist sem enginn sáttahugur sé í henni í garð Rússa á síðustu dögunum í embætti forsætisráðherra.

Mennirnir kváðust vera þeir Ruslan Boshirov og Alexander Petrov, og líkjast mjög þeim mönnum sem breska lögreglan grunar um að hafa komið Novichok-taugaeitri fyrir á útihurð Sergei Skripal. AFP

Þegar hún ræddi við blaðamenn áður en hún lagði af stað til Japan sagði hún að Bretar vildu gjarnan eiga í betri samskiptum við Rússa en til þess verði þeir að hætta að koma fram við önnur ríki líkt og þeir geri. Til að mynda líkt og gerðist á götum úti í Salisbury.

Eitrað var fyrir Sergei Skripal og Júlíu dóttur hans á götu úti í Salisbury í fyrra og síðar lést Dawn Sturgess af völdum eitrunarinnar. Tveir menn, sem talið er að starfi fyrir rússnesku leyniþjónustuna, Anatolií Chepiga og Alexander Mishkin, eru grunaðir um verknaðinn.