Sér fyrir endann á hitabylgjunni — í bili

Eftir fordæmalausa hitabylgju sem gengið hefur yfir vesturhluta Evrópu síðustu daga er von á lægri hitatölum. Á Spáni glíma slökkviliðsmenn enn við afleiðingar hitabylgjunnar þar sem miklir skógareldar geisa og hitinn hefur hæst farið upp í 41,9 gráður. 

Frétt af mbl.is

Ís og sólarvörn fyrir dýrin

Skógareldar hafa einnig kviknað í suðurhluta Frakklands og hafa bændur á vínekrum misst hluta uppskeru sinnar. Hita­met féll í Frakklandi á föstudag þegar hiti fór í 45,9 stig. Veður­stofa Frakk­lands gaf út rauða viðvör­un á fjór­um svæðum, en viðvör­un­in var sér­stak­lega búin til fyr­ir hita­bylgj­una. 

Með metinu slóst Frakkland í hóp sex annarra Evrópuríkja þar sem hiti hefur mælst yfir 45 gráður á einhverjum tímapunkti, en það eru Búlgaría, Portúgal, Ítalía, Spánn, Grikkland og Norður-Makedónía. 

Hitamet hafa verið slegin víða í vesturhluta Evrópu síðustu daga. AFP

Hitamet féll einnig í Þýskalandi þar sem hiti hefur aldrei mælst hærri í júní, 38,9 gráður, og í Róm bað páfi fyrir pílagrímum á Péturstorginu. 

Hitabylgjan, sem stafaði af heitu lofti sem kom frá Afríku, varði í sex daga og samkvæmt opinberum tölum hafa fjórir látið lífið vegna hennar í Frakklandi, tveir á Ítalíu og tveir á Spáni. Hinir látnu eru meðal annarra 17 ára vinnumaður við uppskeru, 33 ára þakviðgerðarmaður og 72 ára heimilislaus maður. 

Spáð er að hitinn muni lækka um allt að tíu stig næstu daga í Frakklandi, en Þjóðverjar og Ítalir verða að bíða fram á þriðjudag eftir því að hitinn lækki, en von er á regnstormi á Ítalíu á þriðjudag.

Von er á regnstormi í Róm á þriðjudag eftir mikla hitabylgju síðustu daga. AFP

• Blogga um frétt