Jarðskjálfti 7,1 að stærð í Kaliforníu

Öflugur jarðskjálfti, 7,1 að stærð, varð í suðurhluta Kaliforníu á níunda tímanum að staðartíma, eða á fjórða tímanum í nótt að íslenskum tíma. Þetta er stærsti skjálftinn á svæðinu í tvo áratugi, en aðeins eru tveir sólarhringar síðan annar öflugur skjálfti, 6,4 að stærð, reið yfir sama svæði. 

Frétt af mbl.is

Öflugur jarðskjálfti í Kaliforníu

Upptök skjálftans voru nærri borginni Ridgecrest, um 240 kílómetra norðaustur af Los Angeles, þar sem vel fannst fyrir skjálftanum, sem og í Las Vegas. Ekki hafa borist tilkynningar um manntjón eða skemmdir á mannvirkjum vegna skjálftans.

Jarðskjálftinn hafði þó ýmisleg áhrif og fresta þurfti leik New Orleans Pelicans og New York Knicks í sumardeild NBA eftir að jarðskjálftinn reið yfir, en hann varði í um tíu sekúndur. 

Dómarar og eftirlitsmenn stöðvuðu leik New Orleans Pelicans og New York Knicks í sumardeild NBA eftir að jarðskjálftinn reið yfir, en hann fannst vel í Las Vegas þar sem leikurinn fór fram. AFP

Slökkviliðið í San Bernardino-sýslu greinir frá því á Twitter að heimili hafi skolfið og að sprungur hafi myndast í byggingum og á vegum. Engar meiri háttar tilkynningar um tjón hafa borist en ljóst er þó að tjónið sé meira en í skjálftanum í fyrradag. Um 2.000 manns eru til að mynda án rafmagns í Kern-sýslu og þá hafa borist nokkrar tilkynningar um eldsvoða í kjölfar skjálftans. 

Skjálftinn í nótt var ellefu sinnum sterkari en sá á fimmtudag. „Þetta er jarðskjálftahrina. Þessir jarðskjálftar tengjast,“ segir Lucy Jones, jarðskjálftafræðingur við Caltech-háskólann. Hún segir um tíu prósent líkur á að annar skjálfti, 7 eða stærri, geti fylgt í kjölfarið. 

Íbúar í suðurhluta Kaliforníu hafa verið iðnir við að deila upplifun sinni af skjálftanum á samfélagsmiðlum, ekki síst af yfirflæðandi sundlaugum: 

• Blogga um frétt