Þrír blaðamenn myrtir á einni viku

Þrír blaðamenn hafa nú verið myrtir á einni viku í Mexíkó. Jorge Ruiz Vazques, blaðamaður hjá El Grafico de Xalapa í Veracruz-ríki var skotinn til bana fyrir helgi, einungis viku áður en hann átti að bera vitni í máli sem snerist um líflátshótanir á hendur honum.

Blaðamaðurinn hafði fullyrt að borgarstjórinn í borginni Actopan, Paulino Domínguez Sánchez, stæði á bak við hótanirnar. Nú er hann látinn og bætist þar með í hóp tveggja annarra blaðamanna, sem hafa fundist látnir á síðustu dögum, en báðir störfuðu þeir í Guerrero-ríki.

Annar þeirra fjallaði aðallega um störf lögreglunnar. Hann fannst látinn í skotti bifreiðar og bar þess merki að hafa verið pyntaður áður en hann var skotinn til bana.

Morðtíðnin eykst ár frá ári

Nú hafa alls tíu blaðamenn verið myrtir í Mexíkó á þessu ári, samkvæmt þarlendum baráttuhópi fyrir öryggi blaðamanna.

En fólk úr öðrum starfsstéttum er einnig myrt. Fjöldi morða á fyrri hluta ársins hefur aldrei verið jafn mikill og núna, samkvæmt opinberum tölum. Yfir 35.000 morð voru framin í Mexíkó í fyrra, samkvæmt umfjöllun Wall Street Journal.

Í frétt Guardian segir að ofbeldisaldan undirstriki þá miklu áskorun sem forseti landsins Andreas Manuel Lopez Obrador standi frammi fyrir, en er hann tók við embætti í desember hét hann því að stemma stigu við ofbeldi í ríkinu.

• Blogga um frétt