Um hundrað þúsund dauðsföll á árunum 2006 til 2012 í Bandaríkjunum má rekja til of stórra ópíóðaskammta. Þetta kemur fram í gagnagrunni sem The Washington Post birti í síðasta mánuði sem geymir ógrynni gagna um ópíóða sem bandaríska ríkið hefur undir höndum. Gagnagrunnurinn er opinn öllum.
Tölurnar sem finna má í gagnagrunninum eru sláandi. Gögnin eru flokkuð eftir ríkjum og sýslum og sýna meðal annars magn oxycodone- og hydrocodone-pilla sem flutt voru inn í ríkin á þessu sjö ára tímabili.
Þrjú lyfjafyrirtæki, SpecGx, Actavis Pharma og Par Pharmaceutical, framleiða um 88% lyfjanna.
Colorado Springs Independent hefur tekið saman tölur um ópíóðafaraldurinn í ríkinu en þær sýna meðal annars fram á að apótek í ríkinu tóku á móti rúmlega milljarði lyfseðla fyrir ópíóðalyfjum á tímabilinu.
Í El Paso-sýslu var tæplega 126 milljónum ópíóðataflna ávísað, eða sem nemur 30 töflum á hvern íbúa á ári. Til samanburðar var tæplega 77 milljónum taflna ávísað í Denvers-sýslu, eða um 18 töflum á hvern íbúa á ári.
Ópíóðafaraldurinn í Bandaríkjunum er einna helst rakinn til Sackler-fjölskyldunnar, moldríkrar fjölskyldu sem hagnast á sölu verkjalyfsins OxyContin. Lyfið, sem kom á markað á tíunda áratug síðustu aldar, reyndist sérlega ávanabindandi og er talið eiga stærstan þátt í þeim ópíóðafaraldri sem nú geisar. Milljónir eru háðar þessum lyfjum og heilbrigðisyfirvöld standa ráðþrota frammi fyrir vandanum.
Samkvæmt gögnum The Washington Post eru í dag um 1.600 borgir, sýslur, ríki, verkalýðsfélög og einstaklingar sem hafa höfðað mál gegn lyfjaframleiðendum og -dreifendum víðs vegar um Bandaríkin.
Rauði þráðurinn í þeim öllum er sá hinn sami: Að fyrirtækin hafi kveikt neistann að ópíóðafaraldrinum sem hefur orðið að minnsta kosti 100.000 manns að bana á síðustu 13 árum og dauðsföllin halda áfram að hlaðast upp. Farið er fram á háar skaðabætur frá fyrirtækjunum sem á að nýta til að sporna gegn faraldrinum.
Fréttin hefur verið uppfærð.