Grænlendingar segjast „ekki til sölu“
Setja bókamerki
Grænlenska utanríkisráðuneytið brást í dag við fréttaflutningi gærdagsins af meintum áhuga Trump Bandaríkjaforseta á því að kaupa eyjuna. Á Twitter-síðu ráðuneytisins kemur fram að Grænlendingar séu tilbúnir að stunda viðskipti, en séu „ekki til sölu.“
„Grænland er auðugt af auðlindum eins og jarðefnum, hreinu vatni og ís, fiskistofnum, sjávarfangi og endurnýjanlegri orku og er einnig nýr áfangastaður fyrir ævintýraferðamennsku. Við erum opin fyrir viðskiptum, en ekki til sölu,“ segir í tísti ráðuneytisins, sem vísar svo á opinbera upplýsingasíðu um ferðamennsku á Grænlandi.
Kim Kielsen, formaður grænlensku landstjórnarinnar, tjáði sig á svipuðum nótum í yfirlýsingu í dag, sagði Grænlendinga tilbúna til samstarfs við allar þjóðir, þar á meðal Bandaríkin, en sagði landið síður en svo til sölu.
Wall Street Journal greindi sem kunnugt er í gærkvöldi frá því að Donald Trump Bandaríkjaforseti íhugaði að kaupa Grænland og hefðu rætt það í fjölda skipta við ráðgjafa sína, þó í misalvarlegum tóni.
Mikið hefur verið fjallað um málið í fjölmiðlum í Bandaríkjunum og Danmörku í dag, en sérfræðingar hafa lýst því yfir að Danmörk gæti ekki selt Grænland, þó vilji stæði til þess.
Aaja Chemnitz Larsen, grænlenskur þingmaður á danska þjóðþinginu, segir að hún myndi segja „nei takk“ við öllum umleitunum Bandaríkjanna um kaup á Grænlandi. Hún teldi það ekki heillaspor fyrir Grænlendinga, sérstaklega sökum þess að þeir búi við öflugt velferðarkerfi, samkvæmt því sem DR greinir frá.
Hraun fór yfir Grindavíkurveg
Hraunið við bílastæði Bláa lónsins
Átti ekki að láta pirring bitna á sjúklingi
„Má segja að þetta gos hafi þjófstartað“
Mjög alvarlegt ef Njarðvíkuræð gefur sig
Hluti bílastæðis undir hraun: Ómögulegt að meta tjón
Maskína: Framsókn í fallbaráttu
Búseta skortir byggingarlóðir