Segir Dani ekki geta selt Grænland
Setja bókamerki
Það er af og frá að Danir geti selt Grænland. Þetta segir lektor við Grænlandsháskóla í samtali við Jyllands Posten.
Wall Street Journal greindi í gærkvöldi frá því að Donald Trump Bandaríkjaforseti íhugaði að kaupa Grænland. Danskir fjölmiðlar hafa fjallað um málið í morgun og segja sumir þeirra hugmyndina ekki jafn fáránlega og hún kunni að hljóma í fyrstu. Benti Berlingske Tidende m.a. á að Grænland væri einfaldlega of mikilvægt og stórt til að bandarísk stjórnvöld gætu sætt sig við að vera með heila heimsálfu í bakgarði sínum sem þau hefðu enga stjórn yfir.
Rasmus Leander Nielsen, aðjúnkt við Grænlandsháskóla, segir söguna af mögulegum Grænlandskaupum Trumps hins vegar vera skrýtna sögu sem eigi sér enga stoð í veruleikanum. Jafn fáránlegt sé líka að hópar danskra stjórnmálamanna séu nú að lýsa því yfir að ekki standi til að selja Grænland.
„Danmörk getur einfaldlega ekki selt Grænland,“ segir Nielsen. Það sé að hluta til vegna fyrirkomulags sem var komið á eftir heimsstyrjöldina síðari þar sem reglur voru settar um sölu eyja sem þegar eru í byggð. Danir geti því ekki selt Grænland án aðkomu Grænlendinga sjálfra.
Sjálfstjórnarlögin frá 2009 kveði enn fremur skýrt á um að Grænlendingar séu sínir eigin herrar. „Þannig að það er skýrt nei við spurningunni um það hvort það sé Danmerkur að selja Grænland,“ bætir hann við.
Þetta er þó ekki í fyrsta skipti sem Bandaríkin hafa lýst yfir áhuga á Grænlandi. Þannig bauð Harry Truman, þáverandi Bandaríkjaforseti, Dönum eitt hundrað milljónir Bandaríkjadala fyrir Grænland árið 1946 en Danir neituðu að selja. Var það önnur tilraun Bandaríkjanna til þess að eignast landið, en árið 1867 hafði utanríkisráðuneytið bandaríska einnig sent fyrirspurn til Danmerkur um kaup á Grænlandi. Þá átti Ísland raunar að fylgja með í kaupunum líka, en ekkert varð af því.
Minntust 10 ára drengs sem lést á öðrum degi jóla
Yfir 200 skjálftar frá upphafi hrinunnar
Aðgerðum slökkviliðs lokið
Ekkert lát á árekstrum
Ein stærstu fangaskipti innrásarstríðsins
/frimg/1/39/97/1399719.jpg)
Fleiri eldsstöðvar byrsta sig