Erlent | mbl | 25.8.2019 | 8:30 | Uppfært 11:06

Amazon-eldarnir séðir úr lofti

Fréttaritari BBC í Suður-Ameríku segist aldrei hafa séð neitt svo átakanlegt í heimsálfunni. AFP

Skógareldarnir sem geisa í Amazon-regnskóginum valda heimsbyggðinni miklum áhyggjum og hafa leiðtogar helstu iðnríkja heims tekið málið upp á fundi sínum.

Þá keppist almenningur sem og fræga fólkið við að deila ljósmyndum og myndskeiðum af ástandinu á samfélagsmiðlum, en komið hefur í ljós að mikið af því efni sem er í dreifingu er gamalt og jafnvel ekki frá Amazon-skóginum.

Frétt af mbl.is

Gamlar myndir blekkja stjörnur

Nú hafa Greenpeace-samtökin hins vegar flogið yfir eldana í Rondônia, svæðinu sem hefur orðið einna verst úti, og hleypt fréttastofu BBC með í för. Í myndskeiðinu hér að neðan er því hægt að sjá hversu slæmt ástandið er í raun og veru.

Fréttaritari BBC í Suður-Ameríku, sem flaug yfir regnskógana með Greenpeace, segist aldrei hafa séð neitt svo átakanlegt í heimsálfunni.