Fellibylurinn Dorian er orðinn fjórða stigs fellibylur að mati bandarísku fellibyljamiðstöðvarinnar, NHC. Dorian stefnir á Bahamaeyjar í dag og mun að öllum líkindum ná á land á Flórída á mánudag.
Varað er við vindstyrk Dorian en áætlað er að vindhraði geti náð allt að 60 metrum á sekúndu. Úrhellisrigning getur einnig fylgt fellibylnum með tilheyrandi flóðum. Hubert Minnis, forsætisráðherra Bahamaeyja, varar sömuleiðis við miklum öldugangi sem mun fylgja Dorian. Neyðarástandi hefur verið lýst yfir á eyjunum og keppast ferðamenn við að yfirgefa Bahama áður en alþjóðaflugvellinum verður lokað.
Neyðarástandi hefur einnig verið lýst yfir í Flórída en íbúar á hættusvæðum hafa enn sem komið er ekki verið beðnir að yfirgefa heimili sín. Íbúar hafa birgt sig upp af mat, drykk og lyfjum og Ron DeSantis, ríkisstjóri Flórída, beinir því til fólks að hafa vikubirgðir af helstu nauðsynjum og búa sig undir það versta.
Veðurfræðingar hafa varað við því að Dorian gæti orðið hættulegasti fellibylur sem gengur yfir Flórídaríki síðan fimmta stigs fellibylurinn Andrew gekk á land árið 1992. Hann varð 65 einstaklingum að bana og eyðilagði um 63.000 heimili.
Donald Trump Bandaríkjaforseti aflýsti för sinni til Póllands um helgina til að vera til taks þegar fellibylurinn gengur á land. Um 2.500 þjóðvarðliðar hafa verið kallaðir út í Flórída og 1.500 til viðbótar eru í viðbragðsstöðu.