Erlent | mbl | 2.9.2019 | 12:55 | Uppfært 14:47

Rekinn skömmu fyrir árásina

Árásarmaðurinn komst í kast við lögin árið 2002 og flúði meðal annars af vettvangi þegar lögregla reyndi að handtaka hann. Hann hefði því ekki átt að geta keypt riffilinn sem hann notaði á laugardag. AFP

Árásarmaðurinn sem skaut sjö til bana og særði 22 í borgunum Odessa og Midland í Texas á laugardag var rekinn úr starfi sínu sem vörubílstjóri nokkrum klukkustundum áður en hann lét til skarar skríða. Reuters greinir frá.

Minningarathöfn fór fram í Odessa í gær þar sem fórnarlambanna var minnst og voru hundruð íbúa viðstödd athöfnina.

Árásarmaðurinn hóf skotárásina eftir að tveir lögreglumenn stöðvuðu hann á Midland-þjóðveginum við öryggiseftirlit þegar hann gaf ekki stefnuljós. Áður en hann stöðvaði bifreiðina dró hann fram riffil og skaut í átt að lögreglubílnum. Einn lögregluþjónn særðist og upphófst eltingaleikur þar sem árásarmaðurinn stal póstbíl og skaut á flesta þá sem urðu á vegi hans. Lögregla skaut árásarmanninn til bana fyrir utan kvikmyndahús í Odessa.

Frétt af mbl.is

Sjö látnir eftir skotárásina í Texas

Lögreglan rannsakar nú fimmtán mismunandi staði í borgunum tveimur þar sem árásarmaðurinn skaut á vegfarendur. Lögregluvarðstjórinn Michael Gerke segist hins vegar ekki geta verið fullviss um hvað árásarmaðurinn ætlaði sér.

Hundruð í búa komu saman í Odessa í gær til að minnast fórnarlambanna. AFP

Slakað á byssulöggjöf daginn eftir árásina

Ný byssulög tóku gildi í Texas í gær, lög sem voru samþykkt á ríkisþinginu fyrir sumarfrí. Lögin veita byssueigendum ýmsar tilslakanir, en nú er til að mynda ekki hægt að banna skráðum byssueigendum að geyma skotvopn og skot í læstum bílum á skólalóð, svo lengi sem vopnið er ekki sýnilegt.

Aðrar breytingar fela meðal annars í sér að nú má geyma skotvopn og skot á öruggum stað á fósturheimilum í sjálfsvarnarskyni og þá má ekki kæra íbúa í Texas fyrir að bera skammbyssu þegar þeir eru fluttir frá heimilum sínum sökum hamfara. Samkvæmt nýju lögunum má bera vopn í kirkjum, bænahúsum gyðinga og öðrum tilbeiðsluhúsum.