Trump aflýsir friðarviðræðum við talíbana

Donald Trump, forseti Bandaríkjanna, hefur aflýst fyrirhugðum friðarviðræðum við talíbana, en markmið þeirra var að binda enda á stríðsátök Bandaríkjanna sem hafa staðið yfir í landinu í 18 ár. 

Forsetinn birti færslu á Twitter í gær og þar kom fram að hann hefði ætlað að funda með Ashraf Ghani, forseta Afganistans, og hátt settum leiðtogum talíbana í dag. 

Trump aflýsti hins vegar fundinum er hann var staddur á dvalarstað forsetans í Camp David í Bandaríkjunum. Þetta gerði forsetinn eftir að talíbanar viðurkenndu að þeir hefðu staðið á bak við nýlegar árásir þar sem bandarískur hermaður lét lífið. 

Bandaríkjaher réðst inn í Afganistan og steypti talíbönum af stóli árið 2001. 

Talíbanar höfðu skotið skjólshúsi yfir liðsmenn hryðjuverkasamtakanna al-Qaeda sem skipulögðu árásir á Bandaríkin 11. september 2001. 

BBC hefur eftir heimildarmanni úr röðum talíbana, að samtökin muni nú boða til neyðarfundar til að fara yfir stöðuna. 

Donald Trump, forseti Bandaríkjanna. AFP

• Blogga um frétt