Erlent | AFP | 16.9.2019 | 19:58 | Uppfært 22:32

Trump vill forðast stríð við Íran

Stjórnvöld í Bandaríkjunum hafa birt myndir úr gervihnöttum sem þau segja að sýni fram á að stjórnvöld í Íran beri ábyrgð á loftárásum sem gerðar voru á olíulindir í Sádi-Arabíu á laugardag. Talsmaður hersins í Sádi-Arabíu fullyrðir að írönsk vopn hafi verið notuð í árásunum.

Trump sagði í samtali við fréttamenn í kvöld að allt liti út fyrir að Íran bæri ábyrgð á árásunum en að stjórnvöld í Washington biðu endanlegrar niðurstöðu rannsóknar. Trump fullyrti að Bandaríkin myndu „að sjálfsögðu koma Sádum til bjargar yrðu þeir fyrir árás“ en á sama tíma vill hann forðast stríð við Íran.

Stjórnvöld í Íran hafa alfarið hafnað ásökunum Bandaríkjamanna um að þau beri ábyrgð á árásunum. Uppreisnarmenn Húta hafa lýst yfir ábyrgð á árásunum en Bandaríkjastjórn hefur vísað því á bug, sem og Sádar. Meðal annars á þeim forsendum að drónarnir hafi ekki komið frá þeim svæðum sem þeir halda sig á í Jemen heldur úr norðurátt.

Árásirnar hafa haft í för með sér að olíuframleiðsla Sádi-Arabíu hefur dregist saman um helming og leitt til verulegra hækkana á heimsmarkaðsverði á olíu.

Frétt af mbl.is

Bandaríkin reiðubúin að grípa til aðgerða

Trump sagði á Twitter um helgina að bandarísk stjórnvöld teldu sig vita hver sökudólgurinn væri og væru reiðubúin að grípa til aðgerða þegar það hefði verið staðfest. Beðið væri eftir upplýsingum frá stjórnvöldum í Sádi-Arabíu um það hverja þau teldu ábyrga fyrir árásunum varðandi það til hvaða aðgerða yrði gripið í framhaldinu.

Önnur stórveldi hafa ekki tjáð sig um árásirnar, það er að segja hver stendur að baki þeim. Martin Griffiths, sendifulltrúi Sameinuðu þjóðanna í Jemen, kom fyrir öryggisráð Sameinuðu þjóðanna í dag og sagði hann ekki fullljóst hver hefði staðið að árásunum en ljóst er að þær ýta undir frekari hættu á átökum í heimshlutanum.