Hæstiréttur Spánar komst að þeirri niðurstöðu í morgun að heimilt væri að grafa upp jarðneskar leifar einræðisherrans Franciscos Francos og flytja þær úr grafhýsi í grennd við Madríd.
Ríkisstjórn Spánar samþykkti flutninginn í síðasta mánuði en stjórnin vill ekki að Spánn heiðri minningu einræðisherra. Afkomendur Francos mótmæltu ákvörðuninni en höfðu ekki erindi sem erfiði.
Franco var einræðisherra yfir Spáni 1936-1975. Hann var grafinn í grafhýsi rétt utan við Madríd sem hann lét byggja eftir borgarastríðið á Spáni á fjórða áratug síðustu aldar. Þar hvíla hermenn sem féllu í stríðinu.
Allir dómarar hæstaréttar voru sammála og verða jarðneskar leifar Francos fluttar í kirkjugarð norður af Madríd.