Yfirheyrslur halda áfram í dag yfir fjórum, þremur karlmönnum og einni konu. Þau eru grunuð um manndráp og að hafa lagt á ráðin um mansal eftir 39 fundust látin í tengivagni flutningabíls í bænum Thurrock í Essex-héraði aðfaranótt miðvikudags.
Í frétt AFP kemur fram að karlmaður hafi verið handtekinn á Stansted-flugvelli í Englandi í gær en hann er grunaður um manndráp og að hafa lagt á ráðinn um mansal. Um er að ræða 48 ára Norður-Íra.
Fyrr í gær handtók breska lögregla karl og konu en þau eru bæði 38 ára.
Mo Robinson 25 ára vöruflutningabílstjóri frá Norður-Írlandi, var sá fyrsti sem var handtekinn vegna málsins. Lögreglu hefur verið gefinn aukinn tími til að yfirheyra bílstjórann.
Alls fundust lík átta kvenna og 31 karlmanns í tengivanginum. Að minnsta kosti sex fórnarlambanna voru frá Víetnam og hin kínverskir ríkisborgarar.
Fjölskyldur að minnsta kosti tveggja frá Víetnam segja líklegt að ættingjar þeirra hafi verið í tengivagninum. Fólkið hafi greitt smyglurum háa fjárhæð, jafnvirði tæpra fimm milljóna íslenskra króna, til að komast til Bretlands.
Krufning á hinum látnu hófst í gær, en dánarorsök þeirra liggur ekki fyrir.