Þriðja lota hassmálsins endalausa
Atli Steinn Guðmundsson skrifar frá Ósló
Setja bókamerki
Í fyrramálið hefst þriðja lotan í hinu langvinna hassmáli yfirlögregluþjónsins fyrrverandi í Ósló, Eirik Jensens, og fer málið nú á ný fyrir Lögmannsrétt Borgarþings þar sem dómarar viku sýknuúrskurði kviðdóms til hliðar 28. janúar.
Nokkurt vatn er runnið til sjávar síðan Jensen hlaut 21 árs dóm í héraði 18. september 2017 fyrir hlutdeild í innflutningi á 14 tonnum af hassi í samstarfi við Gjermund Cappelen, hasskónginn frá Bærum, sem sjálfur hlaut 15 ára dóm fyrir innflutning á 16,7 tonnum að fengnum ríflegum afslætti í ákæru Lars Erik Alfheim saksóknara fyrir að benda á samstarfsmann sinn úr röðum lögreglunnar.
Cappelen ákvað að una sinni refsingu, Jensen ekki, og áfrýjuðu þeir John Christian Elden, verjandi hans, málinu til lögmannsréttar þar sem síðasti kviðdómur Noregs, en Stórþingið samþykkti þá breytingu á norskum hegningarlögum með gildistöku 1. janúar 2018 að leggja kviðdóma af, las upp þann úrskurð sinn í hádeginu 28. janúar í ár, að Jensen skyldi vera sýkn af innflutningi á 14 tonnum af hassi en sekur um stórfellda spillingu.
Kristel Heyerdahl dómsformaður tók sér tveggja stunda frest ásamt meðdómurum sínum til að taka afstöðu til úrskurðar kviðdóms og gekk sú afstaða þvert á alla tölfræði í kviðdómsmálum: Niðurstöðu kviðdóms var þar vikið til hliðar hvað fíkniefnahlutann snertir með eftirfarandi rökstuðningi: „Dómurinn telur það hafið yfir vafa að Jensen er sekur um fíkniefnabrot og víkur niðurstöðu kviðdóms til hliðar. Málið verður rekið á nýjan leik frá grunni.“ Elden verjandi lá ekki á skoðun sinni í samtali við mbl.is síðdegis sama dag: „Svona virkar réttarríki ekki,“ sagði hann.
Nú er því svo komið að mál Jensens verður rekið á ný fyrir Lögmannsrétti Borgarþings sem er meira að segja það en gera. Frá 28. ágúst í fyrra og fram yfir áramót voru 77 dómþing haldin í málinu þar sem 120 vitni gerðu grein fyrir því sem þau höfðu orðið áskynja í málinu auk þess sem kviðdómendur hlýddu á mörg hundruð ræður sóknar- og varnarhliðar og lásu mörg þúsund blaðsíður af málsgögnum enda hófst umfangsmikil rannsókn lögreglunnar á Jensen snemma árs 2014. Ofan á þetta yngist Jensen ekki, 60 ára þegar hann hlaut 21 árs dóm sem hann hefur ekki hafið að afplána og nú 62 ára.
Kveðja á stuðningssíðu
Sakborningurinn og verjandi hans láta þó engan bilbug á sér finna og hyggjast berjast meðan öndin þaktir í vitum þeirra. Á lokaðri stuðningssíðu Jensens á Facebook, sem nú telur 22.000 félaga, sendir hann eftir langa þögn stuðningsfólki sínu kveðju gegnum Facebook-aðgang Rögnu Lise Vikre, sambýliskonu sinnar, og kastar þar fram eftirfarandi (21. október):
„Til allra í stuðningshópnum! Við höfum ekki gleymt ykkur! Þriðja lotan er yfirvofandi, eitthvað sem við finnum bæði [þau Vikre] fyrir. Eftir síðustu atburði í dómsalnum höfum við lagt mest upp úr því að vera til staðar fyrir hvort annað. Við höfum vísvitandi læðst með veggjum þegar að því kemur að tjá okkur um niðurstöðuna þar og einkalíf okkar. Að byggja hvort annað upp fyrir nýja atrennu í dómsalnum hefur tekið tíma og að sjálfsögðu verið okkur áskorun.
Jákvæðar og huggulegar stuðningsyfirlýsingar á síðunni og það sem borist hefur eftir öðrum leiðum yljar okkur um hjartarætur! Fram undan eru tvær erfiðar vikur af yfirferð skjala og fundum með lögmönnunum. Við drögum ekki fjöður yfir að þrýstingurinn er mikill á okkur eftir síðasta úrskurð dómsins [úrskurði kviðdóms vikið til hliðar], en við höfum ekki kastað inn handklæðinu og erum búin undir orrustu! Og aftur — við Ragna þökkum allan stuðninginn! E og R.“
Fylgst verður með gangi mála í annarri lotu lögmannsréttarins hér á mbl.is.
Úrskurðaður í nauðungarvistun þegar morðin voru framin
„Viðvaranir dynja á okkur úr öllum áttum“
„Aðal málið er að það urðu engin slys á fólki“
Ólafsvíkingar létu veðurhaminn ekki aftra sér
Fær þingsætið þrátt fyrir skilorðsbundinn dóm
Hriktir í meirihlutanum í borginni
Lífskjör munu versna ef tollar verða lagðir á
„Galið að stimpla málið á svartan húmor“