Slökkviliðsmenn í austurhluta Ástralíu búa sig undir það að gróðureldar sem geisað hafa á svæðinu og kostað hafa þrjá lífið eigi eftir að versna enn frekar.
Fram kemur í frétt AFP að stórborginni Sydney stafi nú mikil hætta af eldunum en um 150 heimili hafa þegar eyðilagst annars staðar vegna þeirra.
Hættumatið fyrir borgina er í efsta stigi en þetta er í fyrsta sinn sem það hefur gerst síðan árið 2009 þegar núverandi kerfi var tekið í notkun.
Rúmlega hundrað eldar brenna á svæðinu og þar af nokkrir sem slökkviliðsmönnum hefur ekki tekist að halda í skefjum.