Erlent | AFP | 23.11.2019 | 9:05 | Uppfært 12:23

Gögn sýna ítrekuð samskipti Pompeo og Giuliani

Rudy Giuliani, einkalögmaður Donalds Trump Bandaríkjaforseta. AFP

Gögn sem bandaríska utanríkisráðuneytið birti í nótt sýna ítrekuð samskipti á milli Mike Pompeo utanríkisráðherra og Rudy Giuliani, einkalögmanns Donalds Trump Bandaríkjaforseta.

American Oversight, óháð samtök sem fylgjast með starfsemi stjórnvalda, óskuðu eftir gögnunum á grundvelli upplýsingalaga. Að mati Austin Evers, forstjóra samtakanna, þykja samskiptin sýna bein tengsl á milli Giuliani, skrifstofu forsetans og utanríkisráðherrans í aðgerð sem snerist meðal annars um að víkja sendiherra Bandaríkjanna í Úkraínu úr embætti.

Meðal þess sem finna má í gögnunum eru tölvupóstsamskipti þar sem fram kemur að þeir hafi talast við í síma 27. og 29. mars á þessu ári.

Mike Pompeo, utanríkisráðherra Bandaríkjanna. AFP

Marie Yovanovitch var látin víkja úr embætti sendiherra tveimur mánuðum áður en Trump átti umdeilt símtal sitt við forseta Úkraínu, þar sem hann hvatti til þess að Biden yrði tekinn til rannsóknar.

Yovanovitch bar vitni fyrir þinginu í síðustu viku vegna rannsóknar á embættisverkum Trump. Hún sagði þinginu að hún hefði verið fórnarlamb óhróðursherferðar Giuliani, sem reyndi að gera hana tortryggilega á sama tíma og hann þrýsti á um að úkraínsk yfirvöld tækju Biden til rannsóknar.

Frétt af mbl.is

„Hún vildi ekki hengja upp mynd af mér“

Evers telur að gögnin séu þau fyrstu af mörgum sem eiga eftir að skýra frekar störf Trump í Úkraínu, sem er miðpunktur rannsóknar Bandaríkjaþings á meintum embættisbrotum forsetans. Evers er sannfærður um að gögnin styrki mál rannsóknarnefndar fulltrúardeildar þingsins enn frekar og sýni að Bandaríkjastjórn hafi ekki verið heimilt að halda þeim frá þinginu. Stjórnin hafi því gerst sek um að hindra framgang réttvísinnar.