Bandarísk kona hefur verið ákærð fyrir tilraun til manndráps fyrir að aka vísvitandi á 14 ára gamla stúlku. Í yfirheyrslu hjá lögreglu sagði konan að hún hefði keyrt á stúlkuna af því að „hún leit út fyrir að vera mexíkósk“.
Stúlkan var á gangi á leið í skólann 9. desember síðastliðinn, í nágrenni Des Moines í Iowa-ríki, þegar konan ók á hana. Lögregla óskaði eftir aðstoð almennings áður en Nicole Marie Poole Franklin var handtekin.
Rannsókn lögreglu leiddi í ljós að ekki hafi verið um slys að ræða heldur hafi verið ekið á stúlkuna af ásettu ráði. Michael Venema lögreglustjóri sagði á blaðamannafundi í dag að hann hafi fengið áfall þegar hann heyrði játningu Franklin.
„Hún sagði margt niðrandi um fólk af suður-amerískum uppruna við rannsakendur málsins,“ sagði Venema og bætti við að slík hatursorðræða væri ekki liðið í samfélaginu.
Franklin, sem er 42 ára, var þegar í haldi lögreglu vegna gruns um ýmis önnur brot sem hún framdi sama dag. Til skoðunar er að ákæra hana fyrir hatursglæp.
Stúlkan fékk heilahristing og marðist alvarlega en er á batavegi.