Erlent | mbl | 7.1.2020 | 7:32

Dæmdur morðingi barðist við árásarmann

AFP

Dæmdur morðingi segist ekki hafa hikað þegar hann reyndi að stöðva vopnaðan mann á London-brúnni í nóvember.

Steven Gallant, sem er 42 ára gamall og afplánar dóm fyrir morð, lýsir því í viðtali hvernig hann tókst á við Usman Khan vopnaður stól. Gallant var með heimild til þess að sækja atburð ætlaðan föngum í sal við brúna. Hann afplánar 17 ára dóm fyrir að hafa myrt fyrrverandi slökkviliðsmann, Barrie Jackson, í Hull fyrir 15 árum.

Khan, sem stakk Saskia Jones og Jack Merritt til bana, var síðar skotinn til bana af lögreglu. Þrír til viðbótar særðust í árásinni sem hófst í Fishmongers-salnum 29. nóvember. Gallant, ásamt tveimur öðrum, reyndi að stöðva Khan en þetta er fyrsta viðtalið við Gallant um árásina.

Frétt af mbl.is

Fjölskylda árásarmannsins í áfalli

Að sögn Gallant heyrði hann að eitthvað var ekki eins og það átti að vera og því fór hann og kannaði málið. „Ég sá sært fólk. Khan stóð í anddyrinu og hélt á tveimur stórum hnífum. Hann var augsýnilega hættulegur öllum þeim sem þarna voru og því hikaði ég ekki.“

Í frétt BBC kemur fram að Gallant var dæmdur ásamt félaga sínum James Gilligan fyrir að hafa ráðist á og drepið Jackson. Við réttarhöldin kom fram að Gallant taldi ranglega að Jackson hefði ráðist á unnustu hans.

„Enginn á rétt á að taka líf annarrar manneskju og ég bið fjölskyldu fórnarlambs míns innilega afsökunar á þeim skaða sem ég vann,“ sagði Gallant við réttarhöldin.

Gallant, sem getur sótt um reynslulausn árið 2022, segir að hann hafi snúið við blaðinu í fangelsinu og að hann muni aldrei beita ofbeldi að nýju. Hann hafi lært að lesa og skrifa í fangelsinu og er að læra viðskiptafræði þar.

Frétt BBC