Ekkja Kobes Bryants, Vanessa Bryant, tjáði sig í fyrsta skipti í gærkvöldi um þyrluslysið sem kostaði eiginmann hennar og dóttur, Giönnu, lífið. Hún segir að fjölskyldan sé algjörlega eyðilögð í kjölfar harmleiksins.

Vanessa og Kobe gengu í hjónaband árið 2001 þegar hún var aðeins 19 ára gömul. Í færslu á Instagram fjallar hún um líðan fjölskyldunnar. 

Bryant og 13 ára gömul dóttir þeirra, Gianna, létust þegar Sikorsky S-76-þyrla sem þau voru um borð í fórst í mikilli þoku í Calabasas, norðvestur af Los Angeles. Alls létust níu í slysinu. Þyrlan var á leið til Mamba Sports-akademíunnar í Thousand Oaks þar sem Gianna átti að taka þátt í körfuboltaleik.

„Það eru ekki til orð sem lýsa sársauka okkar núna,“ segir Vanessa en hún hefur einnig breytt instagrammynd sinni í mynd af Kobe og Giönnu. „Ég finn huggun í því að vita að Kobe og Gigi vissu bæði hvað þau voru elskuð.“ 

Vanessa og Kobe Bryant kynntust við tökur á myndskeiði þar sem hún var við fyrirsætustörf. Hún var 17 ára gömul og nemandi í menntaskóla á þeim tíma. 

Þau trúlofuðu sig árið 2001 og gengu í hjónaband hálfu ári síðar. Þau eignuðust fjórar dætur saman; Natalia er 17 ára, Bianka þriggja ára og Capri er aðeins sjö mánaða gömul. 

Árið 2003 var Kobe sakaður um nauðgun á 19 ára gamalli stúlku á hóteli í Colorado. Vanessa kom fram á blaðamannafundi með eiginmanni sínum í kjölfarið þar sem hann lýsti ást sinni á henni. Hann játaði að hafa verið ótrúr en neitaði því að hafa nauðgað stúlkunni. Málinu var síðar vísað frá þar sem stúlkan féll frá kærunni.

Tengdar fréttir

Kobe Bryant

Lögreglan sek um að dreifa myndum frá slysstað

• Frétti af andláti Bryants á samfélagsmiðlum
• Frú Bryant í mál vegna mynda af þyrluslysinu
• Lögsækir fyrirtækið sem átti þyrluna
• Íslensk skilaboð á minnisvarða Kobe Bryants

» Fleiri tengdar fréttir

• Blogga um frétt