41.000 breytingartillögur fylltu mælinn

Ríkisstjórn Frakklands mun þvinga í gegn umdeildar breytingar á eftirlaunakerfi landsins og sniðganga þannig franska þingið. Frá þessu greindi Edouard Philippe forsætisráðherra í pontu í dag.

Breyt­ing­un­um, sem kynnt­ar voru í nóvember, er ætlað að sam­ræma eft­ir­launa­kerfi lands­ins og af­nema ýmis sér­stök fríðindi op­in­berra starfs­manna. Þar með talið er rétt­ur op­in­berra starfs­manna til að fara á eft­ir­laun 62 ára. Verði til­lög­urn­ar samþykkt­ar munu op­in­ber­ir starfs­menn þurfa að bíða til 64 ára ald­urs til að fá full eft­ir­laun, og hafa þau áform lagst illa í marg­an op­in­ber­an starfs­mann­inn.

Frétt af mbl.is

Verkföll hleypa jólahaldi í uppnám

Stjórnarandstæðingar á franska þinginu beittu málþófi til að tefja afgreiðslu frumvarpsins, en alls lögðu þingmenn fram rúmlega 41.000 breytingartillögur. „Eftir rúmlega 115 tíma umræður að nóttu og degi hefur þinginu aðeins tekist að komast í gegnum átta greinar af 65 og á eftir að fara yfir meira en 29.000 breytingartillögur,“ sagði Philippe.

Sagðist hann harma að markvissar aðgerðir stjórnarandstæðinga, til að koma í veg fyrir að frumvarpið fengi hefðbundna meðferð, yrðu nú til þess að ekki væri hægt að ræða málið almennilega.

Beitir lítt notuðu ákvæði stjórnarskrárinnar

Beitir forsætisráðherrann því lítið notuðu ákvæði 49. greinar frönsku stjórnarskrárinnar, sem jafnan er þekkt sem 49-3, en þar segir að ríkisstjórnin geti þvingað í gegn lagabreytingar án atkvæðagreiðslu svo fremi sem þingið samþykki ekki vantrauststillögu í kjölfarið.

Stjórnarandstæðingar af hægri og vinstri kanti franskra stjórnmála hafa boðað vantrauststillögu á hendur ríkisstjórninni, en ætla má að ríkisstjórnin standi hana af sér. Stjórnarflokkurinn La Republique en Marche, flokkur Macron forseta, hefur 306 sæti af 577 á franska þinginu.

Umræddu ákvæði var síðast beitt árið 2013 er sósíalistinn Francois Hollande, þáverandi Frakklandsforseti, keyrði í gegn ýmsar breytingar á franskri vinnumarkaðslöggjöf, sem margar hverjar voru að undirlagi Emmanuels Macron, núverandi forseta, sem þá gegndi embætti viðskiptaráðherra.

Macron for­seti hef­ur sjálfur lýst breyt­ing­un­um á lífeyriskerfinu sem „sögu­leg­um um­bót­um“, sem ætlað sé að breyta frönsku þjóðfé­lagi í vel­ferðarsam­fé­lag 21. ald­ar og koma í veg fyr­ir 17 millj­arða evra skulda­söfn­un sem fyr­ir­séð er í frönsku líf­eyri­s­kerfi til árs­ins 2025, verði ekk­ert að gert. Sam­kvæmt gögn­um frá OECD fara Frakk­ar mun fyrr á eft­ir­laun en flest­ar vest­ræn­ar þjóðir, en meðal­ald­ur Frakka við upp­haf eft­ir­launa­töku er rétt rúm­lega 60 ár. Hafði forsetinn heitið því að ráðast í þessar breytingar í kosningabaráttunni.

• Blogga um frétt