Bandarískir hermenn yfirgefa Afganistan

Brottflutningur bandarískra hermanna frá Afganistan er hafinn en fækkun í herliði Bandaríkjanna úr rúmlega 12 þúsund hermönnum í 8.600 er liður í friðarsamkomulagi sem Bandaríkin og talíbanar undirrituðu í lok febrúar. Samkomulagið er sögulegt en það var undirritað eftir 18 ára samfelld stríðsátök. 

Fækkun herliðsins á að vera lokið 135 dögum eftir undirritun samkomulagsins og er það ferli nú formlega hafið. 

Frétt af mbl.is

Skrifað undir friðarsamkomulag í Afganistan

Afgönsk stjórnvöld voru ekki hluti af samkomulaginu og hét Ashraf Ghani, forseti landsins, því að föngum yrði ekki sleppt úr haldi líkt kveðið er á um í samkomulaginu. Nú virðist forsetanum hafa snúist hugur og mun hann gefa út tilskipun þess efnis fljótlega sem kveður á um að þúsund föngum verði sleppt úr haldi afganskra stjórnvalda. 

Ghani sór embættiseið í gær en úrslit forsetakosningar sem fóru fram í Afganistan í haust voru kunngjörð í síðasta mánuði. Sú óvenjulega staða er uppi hjá afgönskum stjórnvöldum að tveir forsetar sóru embættiseið. 

Ghani var lýstur sigurvegari með 50,6% atkvæða en Addullah Abdullah, mótframbjóðandi Ghani, viðurkenndi ekki úrslitin og kveðst sjálfur ætla að reyna að mynda stjórn. Abdullah var umkringdur stuðningsmönnum er hann sór embættiseið.

• Blogga um frétt