Erlent | mbl | 31.3.2020 | 8:42 | Uppfært 11:15

„Ég grét þegar...“

Auðar götur einkenna stórborgir heims þessi dægrin og sífellt fjölgar ríkjum sem herða reglur varðandi samkomubann og jafnvel útgöngubann nema brýna nauðsyn beri til. Á sama tíma fjölgar þeim sem lúta lægra haldi fyrir kórónuveirunni en um 38 þúsund manns hafa látist af völdum hennar undanfarna mánuði. Alls hafa verið greind 787 þúsund smit í heiminum samkvæmt upplýsingum frá Johns Hopkins háskólanum.

AFP

Virginia og Maryland urðu í gær síðust af ríkjum Bandaríkjanna til að fyrirskipa íbúum að halda sig heima. Höfuðborgin, Washington DC, fylgdi strax á eftir sem þýðir að þrír af hverjum fjórum Bandaríkjamönnum býr við takmarkaðar heimildir til þess að vera á ferli utan heimilis.

AFP

Bandarískt herskip er nú komið til New York þar sem rekið verður fljótandi sjúkrahús til stuðnings við laskað heilbrigðiskerfi ríkisins. Bráðabrigðasjúkrahús hefur síðan starfsemi síðar í dag í Central Park í New York borg. Yfir þrjú þúsund eru látnir í Bandaríkjunum af völdum COVID-19, þar af þriðjungur hið minnsta í New York. Alls hafa verið greind um 165 þúsund smit í Bandaríkjunum.

AFP

Forseti Bandaríkjanna, Donald Trump, sagði á fundi með blaðamönnum í gær að yfirvöld væru að dreifa nauðsynlegum búnaði víða um land, svo sem öndunarvélum og varnarbúnaði fyrir heilbrigðisstarfsfólki. Hann varaði við því að Bandaríkin stæðu frammi fyrir mikilli áskorun næsta mánuðinn og líkir aðgerðum gagnvart veirunni við stríðstíma.

Lýsing á ótta og angist heilbrigðisstarfsmanna

AFP

Álagið á heilbrigðisstarfsmenn í heiminum er eiginlega að verða ólýsanlegt. Eða eins og franski hjúkrunarfræðingurinn, Elise Cordier, lýsir á Facebook: „Þegar ég vaknaði morgun grét ég. Ég grét þegar ég borðaði morgunverð. Ég grét þegar ég gerði mig klára fyrir daginn.“

Lýsingin á sennilega við um ótta og angist fjölmargra þeirra sem eru í framvarðarsveit gegn veirunni sem eirir fáum sem engum þessa dagana. En um leið og Cordier var mætt á vinnustaðinn þurrkaði hún tárin af hvörmum sér. „Ég andaði inn og út. Fólkið sem liggur á sjúkrahúsinu grætur líka og ég er hér til þess að þerra tár þeirra.“

AFP

Leiðtogar heimsins, þar á meðal þeir sem hafa verið neyddir í einangrun, eru enn að leita leiða til að glíma við erfiðleikana sem herja á efnahagslíf og velferðarkerfi ríkja þeirra. Meiri erfiðleika en flest þessara ríkja hafa glímt við síðan í seinni heimstyrjöldinni. Milljónir eru án vinnu og annar eins fjöldi er kominn í hlutastarf. Til að mynda er því spáð að landsframleiðslan dragist saman um 5,4% í stærsta hagkerfi Evrópu, Þýskalandi, í ár.

Betri tölur frá Ítalíu

AFP

Eftir nokkurra vikna útgöngubann á Ítalíu virðist sem það sé heldur að draga úr fjölgun smita og um leið dauðsfalla. Greindum smitum þar fjölgaði aðeins um 4,1% í gær en dauðsföllin eru orðin 11.591 talsins.

„Tölurnar eru betri en okkar starf heldur áfram,“ segir yfirmaður heilbrigðismála í Lombardia-héraði, Giulio Gallera, en ekkert hérað Ítalíu hefur orðið jafn illa úti og Lombardia. Síðar í dag mun ítalska þjóðin minnast þeirra sem hafa látist úr COVID-19 með mínútuþögn.

T AFP

Þrátt fyrir erfitt ástand í heilbrigðiskerfi Bandaríkjanna hefur Trump heitið því að senda lækningabúnað til Ítalíu, Spánar og Frakklands en það eru þau lönd Evrópu sem hafa glímt við mestu erfiðleikana vegna veirunnar.

Trump ræddi við starfsbróður sinn í Rússlandi, Vladimír Pútín, í gær um nánara samstarf og lækkandi olíuverð.

Pútín hefur hvatt íbúa Mosvu til að virða útgöngubann en öllum verslunum í borginni, fyrir utan þær sem selja nauðsynjavörur, hefur verið lokað.

„Hvernig eigum við að lifa af“

AFP

Anna, sem er 36 ára vefhönnuður í Moskvu, segir í samtali við AFP-fréttastofuna að bannið sé afar erfitt fyrir hana og fimm ára dóttur, Arinu. „En ég vil ekki að Arina veikist þannig að sjálfsögðu munum við virða útgöngubannið,“ sagði hún við fréttamann þar sem hún var á leiðinni í bakaríið að kaupa brauð.

AFP

Útgöngubann hefur valdið miklum erfiðleikum í borgum Afríku og Asíu en stærsta borg Afríku, Lagos, bættist í gær í hóp þeirra borga sem hefur komið á útgöngubanni í tvær vikur. Forseti Nígeríu,Muhammadu Buhari, segir að bannið gildi í tvær vikur og það gildir einnig um höfuðborgina Abuja. Alls búa 20 milljónir í borgunum tveimur.

AFP

„Tvær vikur eru of langur tími. Ég veit ekki hvernig okkur tekst að framfylgja því,“ segir Abdul Rahim, 25 ára námsmaður, en hann aðstoðar einnig systur sína við sölu á ávöxtum á götumarkaði í Lagos.

AFP

Í Simbabve er þriggja vikna útgöngubann í gildi. „Þau þurfa á mat að halda en það er ekkert til að borða,“ segir grænmetissalinn Irene Ruwisi í miðborg Mbare, og bendir á barnabörnin sín fjögur. „Hvernig eigum við að lifa af.“

Byggt á fréttum AFP-fréttastofunnar, Guardian, BBC, New York Times, Telegraph, Sky News, New York Times og Washington Post.