Svartir Bandaríkjamenn virðast fara verr út úr faraldri kórónuveirunnar samkvæmt greiningu á gögnum um smit og dauðsföll í landinu. Í samfélögum þar sem svartir eru í meirihluta eru líkurnar þrisvar sinnum meiri á að smitast og líkurnar á að deyja af völdum Covid-19 eru nærri sex sinnum meiri en í samfélögum þar sem hvítir eru í meirihluta. 

Dánartölur í Bandaríkjunum hækka nú hratt og gögnin um faraldurinn hrannast upp. Í ítarlegri greiningu Washington Post kemur fram að í Milwaukeesýslu í Wisconsinríki, þar sem stærsta borg ríkisins er, er hlutfall svartra í kringum 26% í heildaríbúafjölda. Hins vegar er hlutfall þeirra á meðal látinna 76%. Í Louisiana eru svartir íbúar um 32% af heildinni en 70% látinna. Í Chicago eru svartir einungis um 32% heildarinnar en þrátt fyrir það eru 67% látinna í borginni svört.

Sjúkraflutningamaður flytur sjúkling á spítala í Brooklyn. Heilsufarsbrestir svartra í Bandaríkjunum eru að koma í ljós í faraldri kórónuveirunnar en svartir eru útsettari fyrir hjarta og lungnasjúkdómum. AFP

Þetta er ekki alltaf raunin. Í Flórída eru svartir 16% látinna sem er frekar í samræmi við heildarfjölda þeirra í ríkinu þar sem þeir telja um 15% heildarinnar. Tölurnar á þessum stöðum eru auðvitað ekki jafn háar og þær eru í New York þar sem nærri helmingur allra látinna í Bandaríkjunum er. Tölur um kynþætti hafa þó ekki borist frá New York, hins vegar hafa þær gert það í Michigan þar sem faraldurinn hefur verið skæður. Þar eru svartir 41% látinna en eru einungis 14% heildarinnar.

Á daglegum fundi í gær var Trump Bandaríkjaforseti spurður út í þessar tölur. „Af hverju er hlutfallið þrisvar til fjórum sinnum hærra á meðal svartra samfélaga en annarra?“ spurði hann. „Það er óskiljanlegt og ég kann illa við það,“ sagði forsetinn og bætti því við að von væri á ítarlegri gögnum um málið.

Almennt heilsufar svartra er verra í Bandaríkjunum þar sem þeir eru útsettari fyrir hjartasjúkdómum, sykursýki og lungnasjúkdómum. Líkt og oft hefur komið fram eru þetta áhættuþættir þegar kórónuveiran er annars vegar. Anthony Fauci, yfirmaður ofnæmis- og sóttvarnasjúkdóma í landinu, var einnig spurður út í ástandið og hann sagði að sjaldan eða aldrei hefðu skilin í heilsufari kynþátta í Bandaríkjunum verið greinilegri. Ástandið væri óviðunandi.

Umfjöllun Washington Post í heild sinni.

Fólk er farið að bera andlitsgrímur víða um Bandaríkin til að verja sig fyrir veirunni skæðu. AFP

Donald Trump Bandaríkjaforseti segir von á ítarlegri tölum um hvernig faraldur kórónuveirunnar leggst á ólíka þjóðfélagshópa. AFP

Tengdar fréttir

Kórónuveiran Covid-19

Ekkert um alvarleg veikindi

• Skyldasti ættingi SARS „var í þeirra eigin ísskáp“
• Almenningur fékk ekki nægan aðgang að samningum
• Við höfum „runnið til baka niður brekkuna“
• Grípa til aðgerða: Covid-19 breiðist hratt út

» Fleiri tengdar fréttir

• Blogga um frétt