Rúmlega 2.100 dauðsföll af völdum kórónuveirunnar voru tilkynnt í Bandaríkjunum í gær og hafa aldrei verið fleiri á einum sólarhring. Hæsta talan til þessa var 1.800 frá því fyrr í vikunni.
Er þetta í fyrsta skiptið sem fleiri en tvö þúsund látast á sólarhring í einu landi vegna veirunnar.
Alls hefur rúmlega hálf milljón tilfella greinst í Bandaríkjunum og eru tæplega 19 þúsund látnir. Tilfellin á heimsvísu eru 1,7 milljónir og tæplega 103 þúsund hafa látist.
Sérfræðingar í Hvíta húsinu og Donald Trump Bandaríkjaforseti telja að faraldurinn sé að ná hámarki í landinu.