Erlent | AFP | 13.5.2020 | 10:43 | Uppfært 11:02

ESB vill endurreisa ferðaþjónustuna

Margrethe Vestager á blaðamannafundi í morgun. AFP

Evrópusambandið hefur lagt fram áætlun um að hömlum verði aflétt á landamærum til að efla ferðaþjónustu í sumar.

Landamæri opnuð 15. júní

Með þessu vonast sambandið til að bjarga milljónum starfa í tengslum við ferðaþjónustu en mikil óvissa hefur verið uppi undanfarið vegna kórónuveirunnar.

„Áætlunin sem er lögð fram í dag getur hjálpað mörgum Evrópubúum sem eiga lifibrauð sitt undir ferðaþjónustu og auðvitað líka þeim sem hafa áhuga á að ferðast í sumar,“ sagði Margrethe Vestager, varaforseti framkvæmdastjórnar ESB.

„Okkar skilaboð eru þau að það verður ferðamennska í sumar,“ sagði Paolo Gentiloni, efnahagsstjóri í framkvæmdastjórn ESB, að sögn BBC. „Jafnvel þótt það verði öryggisráðstafanir og takmarkanir.“

Stjórnvöld í Austurríki og Þýskalandi hafa þegar ákveðið að landamæri ríkjanna verði opnuð 15. júní að nýju eftir að hafa verið lokuð í tvo mánuði. Byrjað verður að draga úr höftum á föstudag.

Landamæravörður að störfum við landamæri Þýskalands og Austurríkis. AFP

Legga til samræmdar aðgerðir

Ríkin 27 innan ESB ákveða sjálf hvenær þau vilja opna landamærin sín en ESB hvetur þau til samræmdra aðgerða til að aflétta hömlum.

ESB leggur til að framkvæmdin verði í þremur skrefum. Það fyrsta er núna við lýði þar sem öll óþarfa ferðalög yfir landmæri eru bönnuð. Í næsta skrefi vill ESB aflétta hömlum á milli ríkja og svæða þar sem kórónuveirufaraldurinn hefur haft samskonar áhrif og þar sem heilsufarið er að batna.

Í lokaskrefinu verður öllum hömlum aflétt á landamærum og ferðir á milli ríkja verða eins og þær voru áður en kórónuveiran kom til sögunnar.